اسلام آباد، (اسٹاف رپورٹر) وفاقی حکومت نے مالی سال 2026-27 کے بجٹ میں سرکاری ملازمین کیلئے متعدد مالی مراعات کا اعلان کیا ہے۔ وفاقی سیکریٹری خزانہ امداد اللہ بوسال کے مطابق ملازمین کی بنیادی تنخواہ پر 7 فیصد ایڈہاک ریلیف دیا جائے گا، جبکہ تنخواہوں کے فرق کو کم کرنے کیلئے 15 فیصد ڈسپیرٹی ریڈکشن الاؤنس (ڈی آر اے) بھی فراہم کیا جائے گا۔
انہوں نے بتایا کہ بڑھتے ہوئے سفری اخراجات کے پیش نظر کنوینس الاؤنس میں 50 فیصد اضافہ کیا گیا ہے۔ مزید برآں 2022 میں دیا گیا 15 فیصد اور 2025 میں دیا گیا 10 فیصد ایڈہاک ریلیف بنیادی تنخواہ میں ضم کر دیا جائے گا، جس سے ملازمین کی مجموعی تنخواہوں اور مستقبل کے مالی فوائد میں اضافہ ہوگا۔ یہ وضاحت بجٹ کے بعد ہونے والی پریس کانفرنس کے موقع پر کی گئی، جس میں وفاقی وزیر خزانہ سینیٹر محمد اورنگزیب سمیت دیگر اعلیٰ حکام بھی موجود تھے۔
