کمالیہ (ایڈیٹر نیوز آف پاکستان ڈاکٹر غلام مرتضیٰ ) تحصیل ہیڈ کوارٹر ہسپتال کمالیہ کے ایم ایس، ڈاکٹر میاں محمد عدیل عارف نے میڈیا نمائندگان سے گفتگو کرتے ہوئے کہا ہے کہ آج، صحافت کے عالمی دن کے موقع پر میں تمام صحافی برادری کو دل کی گہرائیوں سے خراجِ تحسین پیش کرتا ہوں، جو دن رات سچائی کی تلاش، عوامی آگاہی، اور مثبت سماجی تبدیلی کے لیے اپنی جانوں کو خطرے میں ڈال کر بھی اپنا فرض نبھا رہے ہیں۔ میڈیا نے ہمیشہ صحت کے شعبے میں ہماری آواز کو عوام تک پہنچانے میں ایک پُل کا کردار ادا کیا ہے۔ خاص طور پر وباؤں، آفات، اور صحت عامہ کے بحرانوں کے دوران صحافیوں نے لوگوں کو مستند معلومات فراہم کیں اور خوف کے بجائے آگاہی کو فروغ دیا۔ ہم ان کی خدمات کو نہ صرف سراہتے ہیں بلکہ انہیں اپنا اہم پارٹنر سمجھتے ہیں۔ ہم اُمید کرتے ہیں کہ مستقبل میں بھی صحافت اسی جذبے سے عوام کی رہنمائی، احتساب اور حق گوئی کا سفر جاری رکھے گی۔ صحافت کی آزادی ایک مہذب معاشرے کی پہچان ہے، اور ہم اس عظیم فریضے کی اہمیت کو تسلیم کرتے ہیں۔ ہم سب مل کر ایک باشعور، صحت مند اور ذمہ دار معاشرے کی تعمیر کر سکتے ہیں۔ جہاں سچائی، آگاہی اور خدمت کو مقدم رکھا جائے۔
