کراچی، (رپورٹ، ذیشان حسین) کراچی ورلڈ بک فیئر (کے ڈبلیو بی ایف) کی منیجنگ کمیٹی نے اعلان کیا ہے کہ پانچ روزہ کراچی ورلڈ بک فیئر 2025 میں 325 سے زائد اسٹالز قائم کیے جائیں گے، جن میں پاکستان کے 140 معروف پبلشرز اور بُک سیلرز کے ساتھ ساتھ 17 ممالک سے تعلق رکھنے والے 40 بین الاقوامی نمائش کنندگان شرکت کریں گے۔ یہ میلہ 18 سے 22 دسمبر 2025 تک کراچی ایکسپو سینٹر کے ہال نمبر 1، 2 اور 3 میں منعقد ہوگا۔ ایونٹ کا انعقاد ایونٹ اینڈ کانفرنس انٹرنیشنل پرائیویٹ لمیٹڈ کے زیرِ اہتمام پاکستان پبلشرز اینڈ بُک سیلرز ایسوسی ایشن (پی پی بی اے) کے تعاون سے کیا جا رہا ہے۔
منیجنگ کمیٹی کے مطابق صوبائی وزیر تعلیم و خواندگی سندھ سید سردار علی شاہ 18 دسمبر کو بطور مہمانِ خصوصی بک فیئر کا افتتاح کریں گے، جبکہ آرٹس کونسل آف پاکستان کراچی کے صدر محمد احمد شاہ بطور مہمانِ اعزاز شرکت کریں گے۔
کراچی ورلڈ بک فیئر قارئین، طلبہ، خاندانوں اور کتاب سے محبت کرنے والوں کے لیے ایک جامع پلیٹ فارم فراہم کرتا ہے، جہاں مقامی اور بین الاقوامی کتب کی وسیع رینج دستیاب ہوگی۔ اس موقع پر پبلشرز، بُک سیلرز، لائبریرینز اور ادارہ جاتی خریدار ایک ہی چھت تلے جمع ہوں گے، جبکہ مصنفین اور قارئین کو براہِ راست ملاقات اور ادبی مکالمے کا موقع بھی میسر آئے گا۔
ترکی، سنگاپور، چین، ملائیشیا، برطانیہ اور متحدہ عرب امارات سمیت متعدد ممالک کے پبلشرز کی شرکت اس میلے کی بڑھتی ہوئی بین الاقوامی اہمیت کو اجاگر کرتی ہے۔ کراچی ورلڈ بک فیئر پاکستان کی بڑی ادبی تقریبات میں شمار ہوتا ہے، جس میں ہر طبقے سے تعلق رکھنے والے لاکھوں افراد کی شرکت متوقع ہے۔
