کراچی، (رپورٹ، ذیشان حسین/اسپورٹس رپورٹر)
35ویں نیشنل گیمز کراچی میں مختلف کھیلوں کے مقابلے اختتام پذیر ہوگئے جن میں پاکستان آرمی نے مجموعی طور پر شاندار کارکردگی دکھاتے ہوئے متعدد ایونٹس میں نمایاں برتری حاصل کی۔ شوٹنگ، کراٹے، ہاکی، بیس بال اور تائیکوانڈو سمیت مختلف ایونٹس میں آرمی کے کھلاڑیوں کی عمدہ کارکردگی قابلِ ذکر رہی جبکہ تھرو بال کے نمائشی مقابلوں نے بھی شائقین کی بھرپور توجہ حاصل کی۔
شوٹنگ ایونٹ میں پاکستان آرمی نے 17 گولڈ، 16 سلور اور 5 برانز میڈلز کے ساتھ پہلی پوزیشن حاصل کی جبکہ نیوی 15 گولڈ، 12 سلور اور 13 برانز میڈلز کے ساتھ دوسرے نمبر پر رہی۔ کراٹے ایونٹ میں بھی آرمی نے 10 گولڈ اپنے نام کیے، جن میں مردوں کے 6 اور خواتین کے 4 گولڈ شامل تھے۔ پنجاب، واپڈا، کے پی اور بلوچستان نے بھی مختلف ویٹ کیٹیگریز اور ٹیم ایونٹس میں اچھا کھیل پیش کرتے ہوئے نمایاں پوزیشنز حاصل کیں۔
بیس بال کے فائنل میں آرمی نے واپڈا کو 7-9 سے شکست دے کر ایونٹ جیت لیا جبکہ خیبر پختونخوا نے پنجاب کو ہرا کر تیسری پوزیشن اپنے نام کی۔ بیڈمنٹن ایونٹ میں واپڈا کے عرفان سعید اور ماحور شہزاد نے مینز اور ویمنز سنگلز کے ٹائٹلز جیتے، جبکہ آرمی کے راجا حسنین اور عمارہ اشتیاق نے شاندار کارکردگی دکھاتے ہوئے ڈبلز اور مکسڈ ڈبلز میں گولڈ میڈلز حاصل کیے۔
ہاکی ایونٹ میں بھی مقابلے خاصے سنسنی خیز رہے۔ مینز فائنل میں آرمی نے نیوی کو 1-2 سے شکست دے کر ٹائٹل جیت لیا، جس میں محمد اویس نے دونوں گول اسکور کیے۔ ویمنز فائنل میں واپڈا نے پنجاب کو 1-2 سے مات دے کر گولڈ میڈل حاصل کیا۔ فائنلز اور اختتامی تقاریب میں پاکستان اولمپک ایسوسی ایشن اور پاکستان ہاکی فیڈریشن کے اعلیٰ عہدیداران سمیت اولمپینز اور آفیشلز کی بڑی تعداد شریک ہوئی۔
تائیکوانڈو ایونٹ بھی بھرپور کامیابی کے ساتھ مکمل ہوا جس میں مردوں اور خواتین دونوں کیٹیگریز میں پاکستان آرمی نے پہلی پوزیشن حاصل کی۔ رنگا رنگ اختتامی تقریب میں کورین قونصل جنرل سمیت اہم مہمانان نے میڈلز تقسیم کیے اور آرگنائزنگ ٹیم کے معیاری انتظامات کو سراہا۔ دوسری جانب تھرو بال کے نمائشی مقابلوں میں سندھ، کے پی، نیوی اور ریلوے کی ٹیموں نے مختلف میچز میں بہترین کھیل پیش کیا اور شائقین کی بڑی تعداد نے مقابلوں میں دلچسپی ظاہر کی۔
