کراچی، (رپورٹ، ذیشان حسین/اسٹاف رپورٹر) چیف سیکریٹری سندھ آصف حیدر شاہ نے صوبے بھر میں ایم ڈی کیٹ کے کامیاب اور شفاف انعقاد پر اطمینان کا اظہار کیا ہے۔ انہوں نے سکھر آئی بی اے کی نگرانی میں ہونے والے امتحان کے مثالی انتظامات کو سراہتے ہوئے کہا کہ شفافیت یقینی بنانے کے لیے تین سطحی ویجیلینس نظام قائم کیا گیا، جس میں سکھر آئی بی اے، محکمہ صحت، اور ضلعی انتظامیہ پر مشتمل علیحدہ ٹیمیں شامل تھیں۔
چیف سیکریٹری آفس کی جانب سے بھی 10 ویجیلینس کمیٹیاں تشکیل دی گئیں جنہوں نے اسلام آباد سمیت سندھ بھر کے امتحانی مراکز میں انتظامات کی نگرانی کی۔ ایم ڈی کیٹ میں 32 ہزار 531 سے زائد امیدواروں نے حصہ لیا، جبکہ امتحان کے لیے 10 مراکز اسلام آباد، کراچی، حیدرآباد، لاڑکانہ، جامشورو، سکھر، جیکب آباد، میرپورخاص، اور شہید بینظیر آباد میں قائم کیے گئے۔
آصف حیدر شاہ نے کہا کہ سکھر آئی بی اے، ضلعی انتظامیہ اور متعلقہ اداروں کی مشترکہ کاوشوں سے امتحان شفاف انداز میں مکمل ہوا۔ انہوں نے اس موقع پر کہا کہ سندھ حکومت کی اولین ترجیح شفافیت اور میرٹ ہے، اور ایم ڈی کیٹ کے کامیاب انعقاد نے عوام کے اعتماد کو مزید مضبوط کیا ہے۔ امیدواروں، والدین اور میڈیا کی جانب سے بھی امتحانی انتظامات کو سراہا گیا۔
