کراچی، (رپورٹ، ذیشان حسین/اسپورٹس رپورٹر) نیشنل بینک آف پاکستان کی جانب سے بریسٹ کینسر سے آگاہی کے لیے ’’اننگز آف دی اویئرنس‘‘ کرکٹ میچ کا انعقاد کیا گیا۔ یہ میچ این بی پی اسپورٹس کمپلیکس میں کھیلا گیا، جس میں مختلف شعبہ جات سے تعلق رکھنے والے افراد نے بھرپور شرکت کی۔
صدر این بی پی رحمت علی حسنی نے اس موقع پر کہا کہ یہ میچ صرف ایک کھیل نہیں بلکہ اس بات کی یاددہانی ہے کہ آگاہی پیدا کرنا ہم سب کی مشترکہ ذمہ داری ہے۔ انہوں نے کہا کہ آگاہی ہمدردی اور عمل سے جنم لیتی ہے، اور ہر فرد خواہ مرد ہو یا عورت، صحت مند زندگی اور بروقت تشخیص کے فروغ میں کردار ادا کر سکتا ہے۔
میچ کا مقصد بریسٹ کینسر کے خلاف جدوجہد کرنے والی خواتین کے ساتھ اظہارِ یکجہتی اور بروقت تشخیص کی اہمیت کو اجاگر کرنا تھا۔ کھلاڑیوں نے خصوصی گلابی آرم بینڈ پہن کر شرکت کی، جبکہ نمایاں کارکردگی دکھانے والے کھلاڑیوں اور منتظمین کو میڈلز اور شیلڈز سے نوازا گیا۔
