کراچی، (رپورٹ، ذیشان حسین/اسٹاف رپورٹر) محکمہ تعلیم سندھ نے صوبے کے تمام نجی اسکولوں میں 10 فیصد فری شپ کے اجراء سے متعلق ریکارڈ کے مکمل آڈٹ کا فیصلہ کیا ہے۔ یہ اقدام سندھ ہائی کورٹ سکھر بینچ کے 9 اکتوبر 2025 کو آئینی درخواست نمبر 1592/2025 پر جاری کردہ فیصلے کے بعد کیا گیا، جس میں عدالت نے صوبائی حکومت کو ہدایت دی تھی کہ نجی تعلیمی اداروں میں فری شپ کے قانون پر سختی سے عمل کرایا جائے۔
ڈائریکٹوریٹ آف پرائیویٹ انسٹی ٹیوشنز سندھ کی ایڈیشنل ڈائریکٹر رفعیہ جاوید کے جاری کردہ اعلامیے کے مطابق، وزیر تعلیم سندھ سردار شاہ اور سیکرٹری تعلیم زاہد عباسی نے احکامات جاری کیے ہیں کہ پہلے مرحلے میں سندھ کے چھ ریجنز کے ان اسکولوں کا آڈٹ کیا جائے گا جن کی ایک سے زائد شاخیں ہیں۔ ڈسٹرکٹ کمیٹیاں پندرہ روز میں ان اسکولوں کا دورہ کریں گی اور طلبہ کی کل انرولمنٹ کے مطابق 10 فیصد فری شپ اسکیم کا مکمل آڈٹ کرکے رپورٹ ہائی کورٹ میں جمع کرائیں گی۔
اعلامیے میں مزید کہا گیا ہے کہ سندھ ہائی کورٹ نے ڈائریکٹوریٹ آف پرائیویٹ انسٹی ٹیوشنز کو 10 نومبر کو مکمل ریکارڈ کے ساتھ طلب کیا ہے۔ وہ اسکول جو 10 فیصد فری شپ قانون پر عمل نہیں کر رہے، ان کی رجسٹریشن منسوخ یا معطل کر دی جائے گی۔ اسی طرح وہ ادارے جنہوں نے رجسٹریشن یا تجدید کی درخواستیں جمع کرائی ہیں لیکن فری شپ اسکیم پر عمل درآمد نہیں کر رہے، ان کی درخواستیں بھی مسترد کر دی جائیں گی۔
محکمہ تعلیم نے واضح کیا ہے کہ آڈٹ کے دوران اگر کوئی اسکول کمیٹیوں سے تعاون نہیں کرتا تو اسے توہین عدالت کا مرتکب سمجھا جائے گا۔ دوسرے مرحلے میں باقی تمام نجی اسکولوں کا بھی آڈٹ کیا جائے گا، اور فری شپ سے متعلق گائیڈ لائنز تمام اداروں کو ارسال کر دی گئی ہیں۔ خلاف ورزی کرنے والے اسکولوں کے خلاف سخت قانونی کارروائی عمل میں لائی جائے گی۔
