اسلام آباد، (ویب اسپورٹس) پاکستان کے کھیلوں کے شعبے میں ایک تاریخی سنگِ میل عبور ہوا ہے، کیونکہ رکنِ قومی اسمبلی سیدہ آمنہ بتول کو فیفا کی معزز ادارہ جاتی اصلاحات کمیٹی میں شامل کر لیا گیا ہے۔ یہ شمولیت پاکستان کے لیے کھیلوں اور سفارت کاری میں ایک اہم پیش رفت کے طور پر دیکھی جا رہی ہے۔
وزارتِ اطلاعات کے مطابق آمنہ بتول کی تقرری فیفا کی جانب سے پاکستان پر اعتماد کی تجدید ہے اور وزیرِاعظم شہباز شریف کی قیادت میں حکومت کے فٹ بال کے فروغ کے عزم کی عکاسی کرتی ہے۔ اس اقدام سے پاکستان کے کھیلوں کے شعبے میں عالمی سطح پر مثبت تاثر پیدا ہوگا۔
اعلامیے میں مزید کہا گیا ہے کہ آمنہ بتول کی تقرری کے بعد پاکستان عالمی فٹ بال برادری میں ایک باوقار اور تعمیری رکن کے طور پر ابھرے گا، اور ملکی فٹ بال کی ترقی کے لیے نئی راہیں کھلیں گی۔
