ذیشان حسین
کراچی، پاکستان کرکٹ بورڈ (پی سی بی) نے نیشنل بینک کرکٹ اسٹیڈیم کراچی کی ازسرِ نو اپگریڈیشن شروع کرنے کا فیصلہ کرلیا ہے۔ ذرائع کے مطابق اس منصوبے پر عملی کام آئندہ ماہ سے شروع کیا جائے گا۔
ذرائع کا کہنا ہے کہ نیشنل بینک اسٹیڈیم کے تمام پرانے اسٹینڈز کو گرا کر جدید طرز پر دوبارہ تعمیر کیا جائے گا جبکہ اسٹیڈیم کے ویو کو بہتر بنانے کے لیے اسٹینڈز کے باہر نصب جنگلے ختم کیے جائیں گے۔
رپورٹس کے مطابق نئے انکلوژرز کا ڈیزائن لاہور کے قذافی اسٹیڈیم سے مماثلت رکھے گا، تاہم چھتوں کی تنصیب کا مرحلہ بعد میں مکمل کیا جائے گا۔
دوسری جانب، ذرائع نے بتایا ہے کہ اسلام آباد میں زیرِ تعمیر نئے کرکٹ اسٹیڈیم کا انتظامی کنٹرول سی ڈی اے (کیپیٹل ڈیولپمنٹ اتھارٹی) کے پاس ہوگا۔
