کراچی (رپورٹ: ذیشان حسین) پاکستان اسکریبل ایسوسی ایشین کے ڈائریکٹر یوتھ پروگرام طارق پرویز کے مطابق انگلینڈ کے شہر ٹورکے میں جاری جونئیر ورلڈ اسکریبل چیمپیئن شپ کے دوسرے روز سات گیمز کھیلے گئے۔ ونڈر بوائے سید عماد علی نے دوسرے روز پورا دن اپنی نمبر ون پوزیشن برقراررکھی۔ دوسرے روز کے اختتام پرعماد چودہ فتوحات اورانیس سو چوراسی کے اسپریڈ اسکورکے ساتھ سرفہرست رہے۔ دانیال ثناء اللہ تیرہ فتوحات کے ساتھ دوسرے نمبر پر ہیں۔ حماد ہادی خان بارہ فتوحات اور بارہ سو بتیس کے اسپریڈ اسکور کے ساتھ تیسرے نمبر پر ہیں، حماد کے جڑواں بھائی حسان ہادی خان کا چوتھا نمبر ہے۔ صہیب ثناء اللہ نے دوسرے روز کا اختتام پانچویں نمبر پر کیا۔ پاکستان ایک بار پھر ورلڈ جونئیر اسکریبل ٹائٹل جیتنے کے قریب ہے۔ ایونٹ کے تیسرے اور آخری روز چار گیمز کھیلے جائیں گے۔
