مکہ مکرمہ (مانیٹرنگ ڈیسک) وزیراعظم عمران خان نے اپنی اہلیہ اور وفد کے ہمراہ عمرہ کی ادائیگی کی۔ تفصیلات کے مطابق وزیراعظم عمران خان نے دورہ سعودی عرب کے دوران اپنی اہلیہ اور وفد کے ہمراہ عمرہ ادا کیا۔ وزیراعظم عمران خان کے ہمراہ وزیر اعلی پنجاب سردار عثمان بزدار اور وزیراعلی کے پی محمود خان نے بھی عمرہ ادا کیا۔ عمرہ کی ادائیگی کے دوران وزیراعظم نے پاکستان کی ترقی و خوشحالی اور مسلم امہ کے اتحاد و یگانگت کی دعا بھی کی۔ گزشتہ روز وزیراعظم 14 ویں اوآئی سی کانفرنس میں شرکت کیلئے تین روزہ دورے پر سعودی عرب پہنچے۔ وزیراعظم پہلے مدینہ منورہ پہنچے جہاں انہوں نے روضہ رسولۖ پر حاضری دی اور مسجد نبویۖ میں نوافل بھی ادا کیے۔
