دبئی (سپورٹس ڈیسک) آئی سی سی نے نئی ٹی ٹونٹی رینکنگ جاری کردی ہے جس کے مطابق پاکستانی ٹیم 135 پوائنٹس کے ساتھ پہلے اور بیٹسمینوں میں بابراعظم پہلے نمبر پر موجود ہیں۔ تفصیلات کے مطابق آئی سی سی کی جانب سے آج جاری کی جانے والی ورلڈ ٹی ٹونٹی رینکنگ میں پاکستان بدستور پہلی پوزیشن پر موجود ہے جبکہ بھارت دوسرے نمبر پر ہے، ویسٹ انڈیز میں عمدہ کارکردگی کی بدولت انگلینڈ نے جنوبی افریقہ اور آسٹریلیا کو پیچھے چھوڑتے ہوئے تیسری پوزیشن پر قبضہ کر لیا ہے۔ جبکہ آسٹریلیا چوتھے، جنوبی افریقا پانچویں، نیوزی لینڈ چھٹے، ویسٹ انڈیز ساتویں، افغانستان آٹھویں، سری لنکا نویں اور بنگلا دیش دسویں نمبر پر ہے، ورلڈ کپ تک پاکستان کی پہلی پوزیشن کو کوئی خطرہ لاحق نہیں ہے۔ بیٹسمینوں میں بابراعظم بدستور نمبر ون، اس کے بعد ٹاپ 10 میں کولن منرو، گلین میکسویل، ایرون فنچ، لوکیش راول، حضرت اللہ زازئی، ڈارسی شارٹ، ایون لیوس، فخر زمان اور ایلکس ہیلز شامل ہیں۔ باﺅلرز میں راشد خان بدستور سرفہرست، شاداب خان کا بھی دوسری پوزیشن پر قبضہ برقرار ہے، عادل راشد 2 درجے بہتری کے ساتھ تیسرے نمبر پر آگئے ہیں، عماد وسیم ایک درجہ تنزلی کے ساتھ چوتھی، کلدیپ یادو بھی ایک درجہ پیچھے ہٹتے ہوئے پانچویں پوزیشن پر آگئے ہیں۔ ٹاپ 10 میں شامل دیگر باﺅلرز میں ایڈم زمپا، شکیب الحسن، اش سوڈھی، فہیم اشرف اور ویسٹ انڈیز کے خلاف عمدہ کارکردگی دکھانے والے کرس جورڈن شامل ہیں، آل راﺅنڈرز میں گلین میکسویل پہلے شکیب الحسن دوسرے نمبر پر ہیں جب کہ اس فہرست میں کوئی پاکستانی ٹاپ 5 میں شامل نہیں ہے۔
