ڈمبولا، (اسپورٹس رپورٹر) بارش سے متاثرہ ٹی ٹوئنٹی انٹرنیشنل میں سری لنکا نے ڈک ورتھ لوئس اسٹرن (ڈی ایل ایس) طریقۂ کار کے تحت پاکستان کو 14 رنز سے شکست دے کر تین میچوں کی سیریز 1-1 سے برابر کر دی۔ رنگیری ڈمبولا اسٹیڈیم میں کھیلے گئے مقابلے میں سری لنکا نے 12 اوورز میں 6 وکٹوں پر 160 رنز بنائے، کپتان داسن شناکا نے صرف 9 گیندوں پر 34 رنز اسکور کیے جبکہ جنتھ لیانگے 22 رنز کے ساتھ ناٹ آؤٹ رہے۔ پاکستان کی جانب سے محمد وسیم جونیئر نے تین وکٹیں حاصل کیں۔
جواب میں پاکستان کو مطلوبہ ہدف حاصل کرنے میں مشکلات کا سامنا رہا، اگرچہ کپتان سلمان علی آغا نے 12 گیندوں پر 45 رنز کی دھواں دار اننگز کھیل کر میچ میں سنسنی پیدا کر دی۔ محمد نواز اور ڈیبیو کرنے والے خواجہ محمد نفے کی شراکت کے باوجود وانندو ہسارنگا کی چار وکٹیں اور متھیشا پتھیرانا و ایشان مالنگا کی آخری اوورز میں شاندار بولنگ پاکستان کو فتح سے دور لے گئی۔
