کراچی، (رپورٹ، ذیشان حسین/اسٹاف رپورٹر) سابق رکن قومی اسمبلی، ایڈوکیٹ ہائیکورٹ اور صدر جوناگڑھ اسٹیٹ لائرز فورم سلمان مجاہد ایڈوکیٹ نے بھارت کی جانب سے پاکستان میں جاری آبی جارحیت کی شدید الفاظ میں مذمت کی ہے۔ انہوں نے کہا کہ صوبہ پنجاب میں حالیہ بے قابو سیلاب کسی قدرتی حادثے کے بجائے بھارت کی سوچی سمجھی سازش کا نتیجہ ہے، جس سے خطرناک صورتحال جنم لے سکتی ہے۔
سلمان مجاہد نے کہا کہ بھارت دانستہ طور پر پانی کو ہتھیار کے طور پر استعمال کرتے ہوئے کھلی آبی دہشت گردی کر رہا ہے، لیکن پاکستانی قوم اپنی جرات، عزم اور اتحاد سے ایک بار پھر بھارت کو شکست فاش دے گی۔
انہوں نے کہا کہ مشکل اور امتحان کی اس گھڑی میں پوری قوم اپنے سیلاب متاثرہ بھائیوں کے ساتھ کھڑی ہے۔ متاثرین کے لیے حکومت پاکستان، پاک افواج اور نیشنل ڈیزاسٹر مینجمنٹ اتھارٹی (NDMA) فوری اور بھرپور امدادی کارروائیاں انجام دے رہی ہیں جو لائقِ تحسین ہیں۔
سلمان مجاہد نے کہا کہ چیف آف آرمی اسٹاف جنرل عاصم منیر اور افواجِ پاکستان کی متاثرین کی بحالی اور ریلیف آپریشنز قابلِ ستائش ہیں، جنہیں پوری قوم خراجِ تحسین پیش کرتی ہے۔ انہوں نے اس عزم کا اظہار کیا کہ افواج پاکستان اور پوری قوم اتحاد و یکجہتی کے ساتھ بھارت کی ہر جارحیت کا منہ توڑ جواب دیں گے۔
