کراچی،(رپورٹ، ذیشان حسین) ویسٹ انڈیز نے جیسن ہولڈر کی آل راؤنڈ کارکردگی کی بدولت پاکستان کو سنسنی خیز مقابلے میں دو وکٹوں سے شکست دے کر تین میچوں کی ٹی ٹونٹی سیریز 1-1 سے برابر کر دی۔ لاڈرہل میں کھیلے گئے میچ میں میزبان ٹیم نے 134 رنز کا ہدف آخری گیند پر حاصل کیا۔
آخری تین اوورز میں 36 رنز درکار تھے، سفیان مقیم نے 17ویں اوور میں 2 وکٹیں لے کر میچ کو دلچسپ بنایا، تاہم ہولڈر (16*) اور شیفرڈ (15) کی جارحانہ بیٹنگ نے میچ کا پانسہ پلٹ دیا۔ ہولڈر نے آخری اوور میں چوکا لگا کر فتح دلائی۔
پاکستان کی جانب سے محمد نواز نے 14 رنز کے عوض 3 وکٹیں حاصل کیں۔
اس سے قبل پاکستان نے پہلے بیٹنگ کرتے ہوئے 133-9 رنز بنائے۔ حسن نواز نے 40 رنز کی جارحانہ اننگز کھیلی۔ ہولڈر نے 4 وکٹیں حاصل کیں۔
سیریز کا فیصلہ کن میچ کل اسی مقام پر کھیلا جائے گا۔
