نصیر آباد (بیورو رپورٹ) بلوچستان کے ضلع نصیر آباد کے شہر ڈیرہ مراد جمالی کے گوٹھ میں باپ اور بیٹی کو گھر میں داخل ہو کر مسلح ملزمان نے فائرنگ کا نشانہ بنایا۔ ڈیرہ مرادجمالی کے گوٹھ عبدالفتح میں فائرنگ سے باپ جاں بحق اور بیٹی زخمی ہوگئی- پولیس کا کہنا ہے کہ گو ٹھ عبد الفتح میں گھر میں گھس کر مسلح افراد نے اس وقت فائرنگ کی جب تمام افراد سوئے ہوئے تھے، فائرنگ کے نتیجے میں گھر کا سربراہ عبد الغنی موقع پر ہلاک ہوگیا جبکہ اس کی 20 سالہ بیٹی شدید زخمی ہوگئی۔ فائرنگ کرنے کے بعد ملزمان باآسانی فرار ہونے میں کامیاب ہو گئے- مقتول کی لاش کو پوسٹ مارٹم کے لیے اور زخمی لڑکی کو علاج کے لیے لاڑکانہ کے اسپتال منتقل کر دیا گیا ہے۔ پولیس کا کہنا ہے کہ واقعے کی وجہ پرانی دشمنی بتائی جا رہی ہے- پولیس نے علاقے کی نا کہ بند ی کر دی تاہم کوئی گرفتاری عمل میں نہیں آئی ہے-ملزمان کی تلاش جاری ہے-
