راولپنڈی (ویب ڈیسک) آرمی چیف جنرل قمر جاوید باجوہ کی زیرصدارت جی ایچ کیو میں کور کمانڈرز کا اہم اجلاس ہوا۔ اجلاس میں بھارتی جارحیت کا منہ توڑ جواب دینے کا فیصلہ کیا گیا۔ ڈی جی آئی ایس پی آر کے مطابق جی ایچ کیو میں ہونے والی کور کمانڈرز کانفرنس میں مقبوضہ کشمیر، قومی سلامتی اور جیو اسٹریٹیجک صورتحال کا جائزہ لیا گیا۔ فورم میں اس عزم کا اعادہ کیا گیا کہ پاکستان کا دفاع ہر حال میں یقینی بنائیں گے۔ پاک فوج وطن کی سالمیت، عزت اور وقار کے تحفظ کیلئے پرعزم ہے۔ کور کمانڈرز کانفرنس میں بھارتی جارحیت کا بھرپور جواب دینے کا فیصلہ کرتے ہوئے کہا گیا کہ کشمیر پاکستان کی شہ رگ ہے۔ کشمیریوں کے حق خودارادیت پر کوئی سمجھوتہ نہیں ہوگا۔ آئی ایس پی آر کے مطابق کانفرنس میں اقوام متحدہ کی جنرل اسمبلی میں مقبوضہ کشمیر میں بھارتی انسانی حقوق کی خلاف ورزیوں کو بے نقاب کرنے کو سراہا گیا، جبکہ بیرون ممالک سے فنڈنگ لے کر ملک کو عدم استحکام کا شکار کرنے والوں کی سازشیں ناکام بنانے پر بھی اطمینان کا اظہار کیا گیا۔
