بٹگرام (رپورٹ: عتیق سلیمانی) خیبر پختونخوا حکومت کی ہدایات پر ضلع بٹگرام میں سخت سردی کے پیش نظر مسافروں اور بے گھر افراد کیلئے عارضی شیلٹر ہوم/ پناہ گاہ سوشل ویلفئیر کمپلیکس چھپرگرام میں قائم کر دی گئی ہے جس میں رضائیاں، کمبل اور کھانے پینے کے انتظامات کئے گئے ہیں۔ ڈپٹی کمشنر بٹگرام سید محمد فرالثقلین نے اسسٹنٹ کمشنر بٹگرام کے ہمراہ شیلٹر ہوم کا دورہ کیا، مسافروں کے ساتھ وقت گزارا اور انتظامات کا معائنہ کیا۔ ڈپٹی کمشنر کے مطابق مسافر اور بے گھر افراد یہاں مفت رات گزار سکتے ہیں اور انھیں مفت کھانے کی سہولت بھی میسر ہوگی۔ ڈپٹی کمشنر نے بتایا کہ بٹگرام میں قائم کئے گئے شیلٹر ہوم کے بارے میں مستحق افراد کو آگاہ کرنے کے لئے تمام ذرائع ابلاغ پر تشہیر کی جارہی ہے تا کہ زیادہ سے زیادہ بے گھر افراد اس سہولت سے فائدہ اٹھائیں۔ انہوں نے کہا کہ حکومت نے سخت موسم میں غر یبوں اور ضرورت مندوں کی تکالیف کا احساس کر تے ہوئے اس سہولت کا اہتمام کیا ہے۔
