عمرکوٹ (رپورٹ: ایم ہاشم شر) پولیس گردی کا ایک اور واقعہ سامنے آگیا۔ ضلع عمر کوٹ تھانہ شادی پلی میں پولیس نے مبینہ طور پر کامبو ولد محمد ایوب کو 10 دن پہلے چوری کے الزام میں گرفتار کیا تھا۔ اہل خانہ کا موقف ہے کہ پولیس نے بھاری رشوت طلب کی نہ دینے پر ملزم پر تشدد شروع کر دیا۔ 10 دن سے غیر قانونی طور پر پولیس نے کامبو کو حبس بے جا میں رکھنے کے بعد تشدد کر کے قتل کر دیا۔ آج صبح پولیس نے فون کیا اور بتایا کہ ملزم نے خود کشی کر لی ہے۔ اہل خانہ نے نعش پولیس اسٹیشن کے سامنے رکھ کر احتجاج شروع کر دیا۔ احتجاج کے بعد پولیس نے نعش کو پوسٹ مارٹم کے لئے میرپور خاص سول ہسپتال منتقل کردیا جہاں مقتول کا پوسٹ مارٹم کیا جائے گا۔ اہل خانہ کا اعلی حکام سے مطالبہ ہے کہ واقعہ کے ذمہ داروں کے خلاف مقدمہ درج کر کے قانونی کارروائی عمل میں لائی جائے۔
