کراچی (رپورٹ: ذیشان حسین) سینٹ پال اسکول کے بولر اویس علی خان نے نویں اسٹیٹ بینک انٹر اسکول کرکٹ ٹورنامنٹ میں اپنے اسکول کی نمائندگی کرتے ہوے سیفیا اسکول کے خلاف تباہ کن بولنگ کا مظاہرہ کیا اور صرف بارہ رنز دیکر چار وکٹیں حاصل کیں، انھیں میں آف دی میچ قرار دیا گیا۔ بعد ازاں اسکول کے وائس پرنسپل رومان روڈریکیوز نے اویس علی خان کو کرکٹ بال تحفہ میں دی۔ اس موقع پر ان کا کہنا تھا کہ اسکول انتظامیہ آپ پر فخر کرتی ہے۔ اسی طرح محنت اور لگن سے کھیلیں اور اسکول کا نام روشن کریں۔ انہوں نے مزید کہا ہماری اولین ترجیح طلبا کو تعلیم کے ساتھ غیر نصابی سرگرمیوں میں حصہ لینے کے مواقع فراہم کرنا ہے تاکہ ان میں پوشیدہ ٹیلنٹ ابھر کر سامنے آئے۔
