کراچی (ویب ڈیسک) لاڑکانہ کے آصفہ ڈینٹل کالج کی طالبہ نمرتا کماری کی ہلاکت کیس میں اب تک کوئی قابل ذکر پیشرفت نہیں ہوسکی ہے۔ تفصیلات کے مطابق نمرتا کماری کی پراسرار موت پر پولیس کی جانب سے کوئی پیشرفت نہ ہوسکی ہے اور نہ ہی ابھی تک نمرتا کے جسمانی اعضا کی فرانزک رپورٹ بھی جاری کی گئی ہے۔ تحقیقات میں پیش رفت کے لئے پولیس نمرتا کی سہیلیوں اورسینئر پروفیسرسمیت تیس سے زائد افراد کے بیانات قلمبند کرچکی ہے۔ دوسری جانب نمرتا کی کلاس فیلو مہران کے ساتھ ایک اور سی سی ٹی وی فوٹیج سامنے آئی ہے، چودہ ستمبر کی سی سی ٹی وی فوٹیج چانڈکا ہاسٹل کے باہر کی ہے جس میں نمرتا، مہران ابڑو کے ساتھ بیٹھی نظر آ رہی ہے۔ واضح رہے کہ آصفہ ڈینٹل کالج کے طلبا مہران ابڑو اور شان علی میمن پولیس حراست میں ہیں۔
