کراچی, (رپورٹ، ذیشان حسین/ اسٹاف رپورٹر) کراچی یونین آف جرنلسٹس (دستور) نے ایک نیوز میں صحافیوں اور میڈیا کارکنوں کی جبری برطرفیوں اور ملازمتوں کے عدم تحفظ پر شدید تشویش کا اظہار کرتے ہوئے متاثرہ ملازمین کے ساتھ مکمل یکجہتی کا اعلان کیا ہے۔ کے یو جے دستور کے صدر نصراللہ چوہدری، سیکریٹری ریحان خان چشتی اور مجلس عاملہ نے اپنے مشترکہ بیان میں کہا کہ ملک بھر کے صحافی پہلے ہی مہنگائی، معاشی دباؤ اور پیشہ ورانہ غیر یقینی صورتحال کا سامنا کر رہے ہیں، ایسے میں میڈیا اداروں کی جانب سے بلاجواز برطرفیاں مزدور اور انسانی حقوق کی سنگین خلاف ورزی ہیں۔ انہوں نے کہا کہ اشتہارات کی آمدن میں اضافے کے باوجود صحافیوں کی تنخواہوں میں خاطر خواہ اضافہ نہیں کیا گیا، جبکہ اب اخراجات میں کمی کے نام پر ملازمین کو فارغ کیا جا رہا ہے جو ناقابل قبول ہے۔
رہنماؤں نے وفاقی وزیر اطلاعات و نشریات عطا تارڑ سے مطالبہ کیا کہ وہ فوری نوٹس لیتے ہوئے متاثرہ میڈیا کارکنوں کو انصاف فراہم کرنے کے لیے فریقین کے درمیان مذاکرات کرائیں۔ کے یو جے دستور نے جبری طور پر برطرف کیے گئے تمام صحافیوں اور میڈیا کارکنوں کی فوری بحالی، تنخواہوں اور واجبات کی بروقت ادائیگی، لیبر قوانین اور ویج بورڈ ایوارڈ پر عملدرآمد کو یقینی بنانے کا مطالبہ کیا۔ تنظیم نے خبردار کیا کہ اگر متاثرہ کارکنوں کے مسائل حل نہ کیے گئے تو صحافتی تنظیمیں اور میڈیا ورکرز مشترکہ احتجاجی تحریک چلانے پر مجبور ہوں گے۔
