کوالالمپور/کراچی، (رپورٹ، ذیشان حسین) پاکستانی کھلاڑیوں نے ملائیشیا میں منعقدہ چوتھے گیٹ وے انٹرنیشنل اسکریبل ٹورنامنٹ میں شاندار کارکردگی دکھاتے ہوئے تمام ٹرافیاں اپنے نام کرلیں۔ تین روز تک جاری رہنے والے ایونٹ میں 9 ممالک کے 80 سے زائد کھلاڑیوں نے شرکت کی، جن میں دنیا کے نمبر 4 کھلاڑی تھاچا کوویرات بھی شامل تھے۔
سینئر کیٹیگری میں سابق ایشین یوتھ چیمپئن حشام ہادی خان نے میدان مار لیا۔ انہوں نے 24 میں سے 17 گیمز میں کامیابی حاصل کی اور 1190 کا شاندار اسپریڈ بنا کر پہلی پوزیشن اپنے نام کی۔ 14 سالہ احمد سلمان دوسرے نمبر پر جبکہ سابق ورلڈ یوتھ چیمپئن عفان سلمان عمدہ کارکردگی کے ساتھ تیسرے نمبر پر رہے۔
یوتھ کیٹیگری میں بھی پاکستان کے نوجوان کھلاڑیوں نے کمال دکھایا۔ مصباح الرحمٰن نے ٹائٹل جیتا، شاہجہان احمد دوسرے اور مصعب فریدی ساتویں نمبر پر رہے۔
پاکستانی اسکریبل کھلاڑیوں کی یہ شاندار فتح اس حقیقت کا ثبوت ہے کہ نوجوان کھلاڑی تیزی سے دنیا کے ٹاپ اسکریبل پلیئرز میں جگہ بنا رہے ہیں اور عالمی سطح پر پاکستان کا نام روشن کر رہے ہیں۔
