کراچی، (اسپورٹس رپورٹر) پاکستان فٹبال کے مداحوں کیلئے خوشی کی خبر سامنے آئی ہے، فیفا نے ناروے نژاد مڈفیلڈر اعتزاز حسین کو پاکستان کی نمائندگی کے لیے باضابطہ طور پر اہل قرار دے دیا۔
32 سالہ اعتزاز حسین کا تعلق ناروے سے ہے اور وہ مشہور اسٹرائیکر ایرلنگ ہالینڈ کے ساتھ مولڈے فٹبال کلب میں کھیل چکے ہیں اعتزاز نے دو سال قبل پاکستان کا پاسپورٹ حاصل کرلیا تھا، جس کے بعد پاکستان فٹبال فیڈریشن نے انہیں قومی ٹیم کا حصہ بنانے کی کوششیں تیز کردی تھیں۔
فیفا کی منظوری کے بعد اعتزاز حسین اب پاکستان کی سینیئر ٹیم میں شرکت کے اہل ہیں وہ اس سے قبل ناروے کی انڈر 16 سے انڈر 23 ٹیموں میں مختلف ایج گروپ سطح پر فٹبال کھیل چکے ہیں۔
اعتزاز حسین کے والدین کا تعلق ضلع گجرات کے شہر کھاریاں سے ہے ان کے شامل ہونے سے پاکستانی فٹبال ٹیم کو مڈفیلڈ میں اہم سہارا ملنے کی توقع ظاہر کی جارہی ہے۔
