کراچی، ڈائمنڈ جوبلی انٹرنیشنل فٹبال ٹورنامنٹ میں پاکستان مردوں کی قومی فٹبال ٹیم نے عمدہ کھیل کا مظاہرہ کرتے ہوئے مالدیپ کو 3-0 سے شکست دے دی۔ یہ پاکستان کی 961 دن بعد پہلی بین الاقوامی فتح ہے جبکہ 1991 کے ایس اے ایف گیمز فائنل کے بعد مالدیپ کے خلاف بھی یہ پہلی کامیابی ہے۔ پہلے ہاف میں دونوں ٹیمیں گول نہ کر سکیں، تاہم دوسرے ہاف میں عمر نواز نے پاکستان کو برتری دلائی۔
پاکستان نے کھیل پر اپنی گرفت برقرار رکھی اور 83ویں منٹ میں عبدالصمد ارشد نے دوسرا گول اسکور کیا، جبکہ 87ویں منٹ میں ہارون حمید کے شاٹ نے ڈیفنڈر سے ٹکرا کر جال کا راستہ ڈھونڈ لیا اس کامیابی کے ساتھ ہی ہیڈ کوچ نولبرٹو سولانو نے بھی پاکستان کے کوچ کی حیثیت سے اپنی پہلی فتح حاصل کی۔ پاکستان فٹبال فیڈریشن کے صدر سید محسن گیلانی نے ٹیم کو مبارکباد دیتے ہوئے امید ظاہر کی کہ شاہین افغانستان کے خلاف اگلے میچ میں بھی اسی جذبے اور کارکردگی کا مظاہرہ کریں گے۔
