اسلام آباد، (ویب نیوز) الیکشن کمیشن آف پاکستان نے ضمنی انتخابات کے سلسلے میں قومی اسمبلی کے 5 اور پنجاب اسمبلی کے 7 حلقوں سے کامیاب ہونے والے امیدواروں کے باضابطہ نوٹیفکیشن جاری کر دیے ہیں۔ کمیشن کے مطابق تمام نوٹیفکیشنز کو سرکاری طور پر گزیٹ آف پاکستان میں شائع کرنے کی ہدایت جاری کر دی گئی ہے تاکہ ان کی قانونی حیثیت مکمل ہو سکے۔ قومی اسمبلی کے جن امیدواروں کی کامیابی کی تصدیق کی گئی ہے ان میں بابر نواز خان، دانیال احمد، محمد نعمان، محمد طفیل اور محمود قادر خان شامل ہیں۔
الیکشن کمیشن نے واضح کیا کہ فیصل آباد کے حلقہ این اے 96 کا نوٹیفکیشن تاحال جاری نہیں کیا گیا، کیونکہ اس حلقے سے متعلق ضابطہ اخلاق کی خلاف ورزی کا کیس زیرِ التوا ہے جو بلال چوہدری کے معاملے سے متعلق ہے۔ کمیشن کے مطابق کیس کا فیصلہ آنے تک این اے 96 کے نتائج کو مؤخر رکھا جائے گا۔ اس کے برعکس، پنجاب اسمبلی کی نشستوں پر کامیاب ہونے والے امیدواروں کے نتائج فوراً جاری کیے گئے ہیں جن میں میاں سلطان علی رانجھا، علی حیدر نور خان نیازی، اعزاز علی تبسم، محمد طاہر پرویز، احمد شہریار، محمد حنیف اور میاں علمدار عباس قریشی شامل ہیں۔
الیکشن کمیشن نے ان ضمنی انتخابات کو مجموعی طور پر شفاف اور قانون کے مطابق قرار دیتے ہوئے کہا ہے کہ باضابطہ نوٹیفکیشن کے اجرا کے بعد کامیاب امیدواروں کی اسمبلیوں میں شمولیت کا عمل جلد مکمل ہو گا۔ ساتھ ہی کمیشن نے انتخابی قوانین کی پابندی پر زور دیتے ہوئے کہا کہ جہاں ضابطہ اخلاق کی خلاف ورزی ثابت ہوگی وہاں قانونی کارروائی ناگزیر ہوگی، اور این اے 96 کا التواء اسی اصولی مؤقف کا حصہ ہے۔
