آپ ﷺ کی ولادت پاک سے بڑھ کر کائنات کیلئے اور کوئی بڑی خوشی اور نعمت نہیں ہے
آپ ﷺ سے اظہارِ محبت کا بہترین طریقہ آپؐ کی سیرت طیبہ پر عمل پیرا ہونا ہے: بانی منہاج القرآن
لاہور (ایڈیٹر نیوز آف پاکستان ۔ ڈاکٹر غلام مرتضیٰ) تحریک منہاج القرآن کے بانی و سرپرست اعلیٰ شیخ الاسلام ڈاکٹر محمد طاہرالقادری نے آمد ربیع الاول کے موقع پر پوری اُمت مسلمہ کو ولادتِ پاک ؐ کی مبارکباد دیتے ہوئے کہا ہے کہ ماہِ ربیع الاول خوشی اور محبت کا پیغام لے کر آتا ہے۔ بلاشبہ آپ ﷺ کی ولادت سے بڑھ کر کائنات کیلئے اور کوئی بڑی خوشی اور نعمت نہیں ہے۔ آپؐ نے دنیا کو علم سے محبت کرنا سکھایا اور حقوق و فرائض کا ایک جامع چارٹر عطا فرمایا۔ آپؐ نے پہلی بار انسانوں کے ساتھ ساتھ جانوروں کے حقوق کا بھی تصور پیش کیا اور اعتدال و رواداری کی فکر دی۔ انہوں نے کہا کہ حضور نبی اکرمؐکے ساتھ حقیقی عقیدت و محبت اور مودت یہ ہے کہ آپ ﷺ کی سیرتِ طیبہ کو اپنے شب و روزکے معمولات کا حصہ بنالیاجائے اور ہماری زندگی کاایک لمحہ بھی سیرت و سُنت مصطفی ؐ سے باہر نہیں ہونا چاہیے۔ انہوں نے کہا کہ اُمت محمدیہ کا ہر فرد اپنے قول و فعل میں مصطفوی سیرت کا آئینہ دار بن جائے۔ شیخ الاسلام نے کہا کہ آپ ﷺ کی سیرت مبارکہ یہ ہے کہ آپ آسانیاں پیدا فرماتے، دوسروں کا بوجھ ہلکا کرتے، دوسروں کے آرام و سکون کا خیال رکھتے، کمزور کی دستگیری اور اعانت فرماتے، آپؐ نے انتہا پسندانہ رویوں کے مقابلے میں ہمیشہ نرم خوئی، خوش اخلاقی، وسعتِ نظری اور کشادہ ظرفی کا مظاہرہ فرمایا، آپ ﷺ نے برائی کا ہمیشہ اچھائی سے جواب دیا، رواداری،محبت و اخوت، رحمت و شفقت، عفو و درگزر، صبر و استقامت، احترام و تکریم، نرم دلی، نرم خوئی، نرم جوئی، شرافت، سخاوت، خیر خواہی، حلم و بردباری آپ ؐ کی پاک سیرت طیبہ کے قابلِ تقلید اور قابلِ فخر اوصاف ہیں۔ آپؐ انسانوں میں سب سے زیادہ سخی، مہمان نواز اور صبر و استقامت کا کامل نمونہ ہیں۔ آپ ﷺ کو رحمۃ للعالمین کا ٹائٹل کسی اُمتی نے نہیں بلکہ اللہ رب العالمین نے عطاء فرمایا ہے۔سیرت طیبہ پر عمل دنیا و آخرت کے لئے کامیابی اور نجات کا راستہ ہے۔
