(ذیشان حسین / اسپورٹس رپورٹر)
پاکستان نے تین ملکی ٹی ٹوئنٹی سیریز کے افتتاحی میچ میں شاندار کھیل کا مظاہرہ کرتے ہوئے افغانستان کو 39 رنز سے شکست دی۔ شارجہ کرکٹ اسٹیڈیم میں کھیلے گئے اس میچ میں سلمان علی آغا کی شاندار نصف سنچری اور حارث رؤف کی تباہ کن بولنگ نے پاکستان کی کامیابی کی بنیاد رکھی۔ اس فتح کے بعد پاکستان اب ہفتہ کو یو اے ای کے خلاف دوسرے میچ میں میدان میں اترے گا، جو مقامی وقت کے مطابق شام سات بجے شروع ہوگا۔
ٹاس جیت کر پہلے بیٹنگ کرتے ہوئے پاکستان نے مقررہ 20 اوورز میں 7 وکٹوں کے نقصان پر 182 رنز بنائے۔ سلمان علی آغا نے ذمہ دارانہ بیٹنگ کرتے ہوئے 36 گیندوں پر ناقابلِ شکست 53 رنز اسکور کیے، جس میں تین چوکے اور تین چھکے شامل تھے۔ ان کی محمد نواز کے ساتھ 53 رنز کی شراکت داری نے ٹیم کو سہارا دیا، خاص طور پر اس وقت جب پاکستان 83 پر چار وکٹیں گنوا چکا تھا۔
ابتدائی بلے بازوں میں صاحبزادہ فرحان نے 21 رنز (10 گیندوں پر) اور فخر زمان نے 20 رنز (17 گیندوں پر) کی مفید اننگز کھیلیں۔ تاہم افغانستان کے بولر فرید احمد نے دو وکٹیں لے کر پاکستانی بیٹنگ لائن پر دباؤ ڈالنے کی کوشش کی۔
جواب میں افغانستان نے ایک موقع پر 92 رنز پر صرف دو کھلاڑی آؤٹ کھوئے تھے مگر اس کے بعد ان کی بیٹنگ لائن اچانک دباؤ کا شکار ہو کر لڑکھڑا گئی۔ صرف چار رنز کے اضافے پر پانچ کھلاڑی آؤٹ ہوئے اور ٹیم 97 پر سات وکٹیں گنوا بیٹھی۔ کپتان راشد خان نے سب سے زیادہ 39 رنز بنائے جبکہ رحمان اللہ گرباز نے 38 رنز کی اننگز کھیلی، مگر دیگر کھلاڑی خاطر خواہ مزاحمت نہ کرسکے۔
پاکستان کے بولرز نے شاندار کارکردگی دکھائی۔ حارث رؤف نے تباہ کن بولنگ کرتے ہوئے 3.5 اوورز میں 31 رنز کے عوض چار وکٹیں حاصل کیں۔ ان کے ساتھ شاہین شاہ آفریدی (2-21)، محمد نواز (2-23) اور صوفیان مقیم (2-25) نے بھی بہترین بولنگ کی۔ افغانستان کی پوری ٹیم 19.5 اوورز میں 143 رنز بنا کر آؤٹ ہوگئی اور پاکستان نے ایونٹ میں شاندار انداز میں فاتحانہ آغاز کیا۔
