متاثرین کورونا کی امداد کیلئے کاروباری ادارے بھی میدان میں اتر آئے۔ جنرل پٹرولیم نے دروش اور چترال کے مستری خانوں میں کام کرنے والے غریب لوگوں میں امدادی سامان تقسیم کیا

چترال (رپورٹ: گل حماد فاروقی) کورونا وائرس سے پوری دنیا متاثر ہوچکی ہے اور لاک ڈاؤن کی وجہ سے روزمرہ کی بنیاد پر کام کرنے والا مزدور طبقہ بری طرح متاثر ہوا ہے۔ یہ لوگ لاک ڈاؤن کی وجہ سے گھروں میں بیٹھے رہتے ہیں ان کی مزدوری نہ ہونے کی وجہ سے اکثر گھروں کے چولہے بھی نہیں جلتے ہیں۔ حکومت نے بھی دعویٰ کیا ہے کہ ایسے لوگوں کی مدد کی جائے گی مگر اس میں اکثر حق دار لوگ رہ جاتے ہیں اور اثر رسوخ والے لوگوں کو یہ امدادی سامان مل جاتا ہے۔ ایسے میں کچھ مخیر حضرات اور کاروباری ادارے بھی اس پسماندہ طبقے کی امداد کیلئے میدان میں اتر آئے ہیں۔ ملک میں موبل آئل کا کاروبار کرنے والی کمپنی جنرل پٹرولیم نے دروش اور چترال کے مستری خانوں میں کام کرنے والے غریب شاگردوں اور روزمرہ دیہاڑی پر کام کرنے والے مستریوں میں امدادی سامان تقسیم کیا۔ جنرل پٹرولیم کے نمائندے ارشاد احمد نے کہا کہ مستری خانے لاک ڈاؤن کی وجہ سے کافی عرصے سے بند پڑے ہیں اور ان میں اکثر ایسے شاگرد کام کرتے ہیں جو روزانہ اجرت لیکر گھر کا چولہا جلاتے ہیں مگر مستری خانے بند ہونے کی وجہ سے ان کی گھر کا چولہا نہیں جلتا۔ تو ان غریب اور نادار لوگوں کو مد نظر رکھتے ہوئے ہمارے ادارے نے تین سو گھرانوں کیلئے امدادی سامان بھیجا ہے جن میں آٹا، دال، چینی، چاول وغیرہ شامل ہیں۔ ان کا کہنا ہے کہ اگرچہ یہ سامان کافی نہیں ہے مگر یہ شروعات ہے اور میں دوسرے کاروباری اداروں کو بھی اپیل کرتا ہوں کہ وہ بھی میدان میں آئیں اور وہ بھی مصیبت کی اس گھڑی میں ضرورت مند لوگوں کے ساتھ مدد کریں۔ جاوید احمد نے کہا کہ اس مقصد کیلئے ہم نے ایک ہفتہ پہلے سروے کیا اور ان لوگوں کے نام لکھے جو صحیح معنوں میں حق دار ہیں تاکہ یہ امداد غلط ہاتھوں میں نہ جائے اور جن لوگوں کا گزارا اچھا ہے ان کو بھی نہ ملے صرف ایسے لوگوں کے نام لکھے گئے جو زکوۃ کے حقدار ہیں یا واقعی میں نادار ہیں ان کے نام چن کر لسٹ بنائی گئی اور اس کے بعد ان کو یہ سامان پہنچایا گیا۔ مستری خانے میں کام کرنے والے ایک غریب مستری بلال نے کہا کہ لاک ڈاؤن کی وجہ سے ہم گھروں میں محصور ہوچکے تھے کاروبار اور مزدوری نہ ہونے کی وجہ سے نوبت فاقوں تک پہنچ چکی تھی اب اس امدادی سامان کی وجہ سے چند دنوں کیلئے ہمارے گھروں میں بھی چولہا جلے گا اور ہمارے بچے بھی سکھ کا سانس لیں گے۔ مستری خانوں میں کام کرنے والے ان غریب مستریوں اور ان کے ہاں روزمرہ اجرت پر کام کرنے والے شاگرد اور مزدوروں نے جنرل پٹرولیم کا شکریہ ادا کیا کہ مصیبت کے اس گھڑی میں ان کو یاد کیا اور ان کے ساتھ مدد کی۔

یہ بھی پڑھیں، نیچے دیے گئے لنک پر کلک کریں: ميرپورخاص محمود آباد پولیس کی کاروائی کراچی کے جرائم پیشہ گینگ کا کارندہ اور منشیات فروش گرفتار
https://www.nopnewstv.com/mirpurkhas-mehmo…ad-police-arrest/ ‎