ڈیرہ اسماعیل خان (رپورٹ: گوہر غنچہ) ایف بی آر ڈیرہ اسماعیل خان سمیت صوبے بھر میں جمعرات سے بے نامی جائیدادوں کے خلاف آپریشن کا آغاز کرے گا۔ آپریشن کے لئے ایف بی آر نے خصوصی ٹیمیں بھی تشکیل دی ہیں۔ ڈیرہ اسماعیل خان، پشاور، ایبٹ آباد، مردان سمیت صوبے کے بڑے چھوٹے اضلاع میں آپریشن کے دوران بے نامی بینک اکاﺅنٹس کو بھی منجمد کردیا جائے گا۔ ڈارئیور، مالی یا کسی نوکر کے نام پر رکھی گئی جائیداد پر بھی اس قانون کا اطلاق ہوگا۔ بے نامی جائیداد کے خلاف تحقیقات کے لئے ایسی جائیداد کو نوے روز کے لئے بحق سرکار رکھا جائے گا۔ خیبر پختونخوا میں ایف آئی اے اور ایف بی آر کی جانب سے بے نامی اکاﺅنٹس کے خلاف بھی کاروائی شروع کررکھی ہے اور اب تک پچاس سے زائد بینک اکاﺅنٹس کو منجمد کیا جاچکا ہے۔ ذرائع نے بتایا ہے کہ خیبر پختونخوا میں ٹیکس چوروں کے خلاف بھی کاروائی شروع کی گئی ہے بیرون ممالک میں اثاثے رکھنے والوں کے خلاف کاروائی میں پہلے سے انہیں نوٹسز جاری کیے جاچکے ہیں۔
