کراچی (رپورٹ: ذیشان حسین) بینک الحبیب کے گیارہویں رشید ڈی حبیب میموریل نیشنل پروفیشنل گولف ٹورنامنٹ کا پہلا راؤنڈ آج کراچی گولف کلب میں کھیلا گیا جس میں پاکستان بھر سے آئے ہوئے 96 بہترین گولفرز نے اپنی صلاحیتوں کا مظاہرہ کیا۔ آج کراچی گولف کلب کے وحید بلوچ لیڈر بورڈ پر67 5 انڈر پار کے ساتھ سرِفہرست رہے۔ انصر محمود اور حمزہ امین 68 انڈر 4 کے ساتھ وحید بلوچ کا تعاقب کر رہے ہیں۔
گولف کورس آج بہترین حالت میں تھا۔ گھاس بہترین تراشے جانے کے باعث گیند کی چال خاصی ہموار تھی۔ کھیل کے علی الصبح آغاز سے اختتام تک موسم خوشگوار اور حدِ نگاہ واضح رہی۔ پاکستان کے قومی گولفر اور دفاعی چیمپیئن محمد شبیر آج 69 انڈر 3 کے ساتھ پانچویں پوزیشن پر ہیں۔ مین ٹورنامنٹ 72 ہول پر 13 سے 16 جنوری کے دوران کھیلا جارہا ہے۔ کھیل کے دوران کووِڈ 19 کے حفاظتی اقدامات پر سختی سے عمل کیا گیا۔
