کراچی، (اسٹاف رپورٹر) عالمی مجلس تحفظ ختم نبوت کے وفد نے کمشنر کراچی سے ملاقات میں کالعدم انجمن سرفروشانِ اسلام کی مبینہ غیر قانونی سرگرمیوں، شہر بھر میں چاکنگ اور اسٹیکرز کی موجودگی پر تشویش کا اظہار کیا۔ وفد نے مؤقف اختیار کیا کہ ریاض احمد گوہر شاہی کی جانب سے تصوف کی آڑ میں اپنے نظریات کی تشہیر کی جا رہی ہے جسے تمام اسلامی مکاتبِ فکر غیر اسلامی قرار دیتے ہیں، لہٰذا اس کی روک تھام کے لیے مؤثر اقدامات کیے جائیں۔
کمشنر کراچی نے وفد کو یقین دہانی کرائی کہ شہر میں کسی بھی قسم کی غیر قانونی سرگرمی برداشت نہیں کی جائے گی اور قانون نافذ کرنے والے اداروں کے تعاون سے ذمہ دار عناصر کے خلاف کارروائی کی جائے گی۔ ملاقات میں عالمی مجلس تحفظ ختم نبوت کے مرکزی رہنما مولانا قاضی احسان احمد، مولانا محمد کلیم اللہ نعمان، مولانا عادل غنی، سینئر ایڈووکیٹ منظور احمد راجپوت، رحیم خان ایڈووکیٹ، مولانا عظیم اللہ عثمان اور قاری جمیل سعید بھی شریک تھے۔
