کراچی، (رپورٹ، ذیشان حسین) اسپیکر سندھ اسمبلی سید اویس قادر شاہ سے عورت فاؤنڈیشن کے وفد نے ملاقات کی، جس کی قیادت ریذیڈنٹ ڈائریکٹر منیزہ خان اور صوبائی پروگرام مینیجر ملکہ خان نے کی۔ ملاقات میں خواتین کے حقوق، صنفی مساوات اور خواتین کو بااختیار بنانے کے حوالے سے تبادلہ خیال کیا گیا۔ وفد نے اسپیکر کو عورت فاؤنڈیشن کی چار دہائیوں پر محیط خدمات، خواتین کی فلاح و بہبود اور ان کے حقوق کے تحفظ کے لیے جاری پروگراموں سے آگاہ کرتے ہوئے بتایا کہ ادارہ 1986ء سے پاکستان میں خواتین کے حقوق کے فروغ کے لیے سرگرم عمل ہے۔
اس موقع پر سید اویس قادر شاہ نے خواتین کے حقوق کے فروغ میں عورت فاؤنڈیشن کے کردار کو سراہتے ہوئے کہا کہ سندھ اسمبلی ملک کی سب سے زیادہ خواتین دوست قانون ساز اسمبلی رہی ہے۔ انہوں نے کہا کہ گزشتہ برسوں میں خواتین کے تحفظ اور بااختیار بنانے کے لیے متعدد اہم قوانین منظور کیے گئے ہیں۔ ملاقات کے اختتام پر وفد نے اسپیکر سندھ اسمبلی کو اپنی کتاب "Milestones of Struggle and Success” پیش کی اور خواتین کے حقوق کے لیے ان کی حمایت اور تعاون پر شکریہ ادا کیا۔
