اسلام آباد، (ویب ڈیسک) وزیراعظم شہباز شریف نے کہا ہے کہ ملکی صنعتی پیداوار اور تجارت میں اضافے کے لیے شعبہ جاتی مسائل کی درست نشاندہی اور بروقت حل ناگزیر ہے انہوں نے کہا کہ پیداواری لاگت کم کرنے اور کاروباری برادری کو سہولیات فراہم کرنا حکومت کی اہم ترجیحات میں شامل ہے۔
وزیراعظم کی زیر صدارت ملکی درآمدات، کسٹمز ڈیوٹی اور تجارتی شعبے میں اصلاحات سے متعلق ذیلی ورکنگ گروپ کی سفارشات پر جائزہ اجلاس منعقد ہوا، جس میں کاروباری نمائندوں نے کسٹمز اور ٹیکس وصولی سے متعلق مسائل سے آگاہ کرتے ہوئے اپنی تجاویز پیش کیں۔
شہباز شریف نے سفارشات کا خیرمقدم کرتے ہوئے متعلقہ وزارتوں کو ہدایت دی کہ قومی ٹیرف پالیسی پر موثر عملدرآمد یقینی بنایا جائے تاکہ درآمدات و برآمدات کو مجموعی معاشی حکمتِ عملی کے ساتھ ہم آہنگ کیا جا سکے ان کا کہنا تھا کہ برآمدات پر مبنی دیرپا معاشی ترقی سرمایہ کاری میں اضافہ، حکومتی تعاون اور انفراسٹرکچر کی بہتری کے بغیر ممکن نہیں۔
وزیراعظم نے یہ بھی ہدایت دی کہ دوطرفہ تجارت اور ٹرانزٹ ٹریڈ کے تحت بارڈر پوائنٹس پر کسٹمز ڈیوٹی کی سخت نگرانی کی جائے اجلاس میں وفاقی وزراء، مشیروں، ایس آئی ایف سی کے چیئرمین، کاروباری نمائندگان اور متعلقہ سرکاری حکام نے شرکت کی۔
