کراچی (رپورٹ: ذیشان حسین) جمعیت علماء اسلام نے پٹرولیم مصنوعات کی قیمتوں میں اضافہ کو مسترد کردیا، ترجمان جمعیت علماء اسلام اسلم غوری نے کہا ہے کہ نااہل حکومت کی جانب سے عوام کو عید کا تحفہ مہنگے پٹرول کی صورت میں دے دیا گیا۔ لگتا ہے حکومت کا پوری قوم کو احساس پروگرام میں بھیک مانگنے پر مجبور کرنے کا پروگرام ہے۔ وہ ارسطو اب قوم کے وزیر ہیں جو 65 روپے پٹرول پر سابقہ حکومتوں پر تنقید کیا کرتے تھے۔ نااہل حکمرانوں نے عوام کا جینا دو بھر کردیا ہے۔ وزیر اعظم کے بال بچے باہر پل رہے ہیں ایسے میں ان کو اپنا گذارہ لاکھوں میں نہیں ہوتا تو بال بچے دار مزدور اور ملازم کا گذارہ اتنی مہنگائی میں کیسے ہوگا؟ پٹرول اور دیگر اشیائے خورد و نوش میں اضافہ کو مسترد کرتے ہیں۔
