سیالکوٹ (رپورٹ: سیدہ نزہت شہناز) ماڈل تھانہ سمبڑیال کی حدود گاؤں ڈھلم بلگن میں دو بچوں کی ماں مریم وراثتی مکان میں رہائش پزیر ہے جبکہ گاؤں ڈھلم بلگن کے بااثر افراد نے مکان پر قبضہ کرنے کی نیت سے دو ماہ قبل مریم کے گھر میں داخل ہوگئے اور اس کو ڈنڈوں اور لاٹھیوں سے تشدد کرکے زخمی کر دیا جس پر متاثرہ خاتون نے متعلقہ تھانہ میں ملزمان کیخلاف درخواست دیدی اور پولیس نے فوری کاروائی کرتے ہوئے مقدمہ درج کرکے ملزمان کو جیل منتقل کردیا تھا۔ بعد ازاں کچھ عرصہ بعد عدالت سے ملزمان ضمانت پر رہا ہوگئے۔ ضمانت پر رہائی کے بعد گاؤں میں آتے ہی ملزمان نے دوبارہ خاتون کے گھر پر قبضہ کرنے کی کوشش کی اور مریم پر ایک بار پھر جان لیوا حملہ کردیا۔ ملزمان نے ڈنڈوں اور لاٹھیوں کا آزادانہ استعمال کرتے ہوئے مریم کو لہولہان کردیا یاد رہے کہ پانچ مرلہ مکان کا مقدمہ عدالت میں زیر سماعت ہے۔ پولیس نے بروقت کارروائی کرتے ہوئے زخمی خاتون کو ہسپتال منتقل کر دیا اور ملزمان کیخلاف قانونی کارروائی شروع کر دی ہے۔
