کراچی (ویب ڈیسک) پی آئی اے کے طیارے میں دوران پرواز دو مسافر خاتون کی ویڈیو بنانے پر آپس میں لڑ پڑے۔ طیارہ لینڈ ہوتے ہی مسافرکو سیکیورٹی اہلکاروں نے حراست میں لے لیا۔ تفصیلات کے مطابق ملتان سے کراچی آنے والی پی آئی اے کی پروازپی کے 331 میں دوران پرواز مسافر آپس میں لڑ پڑے، ایک مسافر کا دوسرے مسافر پرالزام تھا کہ وہ خواتین کی ویڈیو بنارہا تھا۔ ویڈیو بنانے سے منع کرنے پر دونوں مسافر آپس میں الجھ پڑے، فضائی میزبانوں کے منع کرنے کے باوجود نوبت ہاتھا پائی تک پہنچ گئی، دونوں مسافروں نے لاتوں اور گھونسوں کا آزادانہ استعمال کیا۔ طیارے کے عملے نے تمام صورتحال سے کپتان کو آگاہ کیا، جس کے بعد طیارہ کراچی لینڈ ہوتے ہی مسافر کو سیکیورٹی اداروں نے حراست میں لے لیا۔
