کراچی (رپورٹ: ذیشان حسین) ایس ایس پی ساؤتھ ٹریفک اسد ملہی پارکنگ مافیا کے خلاف موٹر سائیکل پر نکلے، جہاں پارکنگ مافیا نے ایس ایس پی سے بھی اضافی رقم طلب کی، بعد ازاں شناخت ظاہر کرنے پر ایس ایس پی نے جعلی چارجڈ پارکنگ کنٹریکٹر کو گرفتار کرلیا۔ اس کے علاوہ ٹریفک پولیس نے صدر، کلفٹن اور عبداللہ ہارون روڈ سے چوبیس سے زائد جعلی چارجڈ پارکنگ کنٹریکٹر کو گرفتار کیا۔ اس موقع پر ایس ایس پی اسد ملہی کا کہنا تھا کہ گرفتار افراد شہریوں سےغیر قانونی طریقے سے اضافی رقم بٹور رہے تھے، سرکاری طور پر 10 روپے موٹرسائیکل اور گاڑیوں کے 20 روپے مقرر ہیں۔ اسد ملہی نے عوام سے اپیل کی ہے میں خود اضافی چارج پارکنگ وصول کرنے والوں کو مانیٹر کر رہا ہوں، اضافی رقم وصول کرنے والے کنٹریکٹرز کی اطلاع ٹریفک پولیس کو دی جائے۔
