ایتھنز / یونان (رپورٹ: ملک فیصل سمرالہ) سفارت خانہ پاکستان یونان کے کونسلر امیگریشن صفی اللہ جوکھیو نے آولونا جیل کا دورہ کیا اور پاکستانی قیدیوں سے ملاقات کی۔ انھوں نے جیل کے پولیس چیف خریستوفوروس یاناکوپولوس سے بھی ملاقات کی اور رمضان المبارک میں قیدیوں کی فلاح و بہبود سے متعلق امور پر تبادلہ خیال کیا۔ انہوں نے قیدیوں میں رمضان المبارک کی مناسبت سے سامان تقسیم کیا جس میں جائے نماز، رمضان کیلینڈر، کھانے پینے کا سامان (جام شیریں، سموسے، کھجوریں) اور حفظان صحت کی اشیاء (صابن، شیمپو، ٹوتھ پیسٹ اور برش) شامل ہیں۔ قیدیوں نے کونسلر امیگریشن سے اپنے مسائل پر بات چیت کی۔ سفارت خانہ پاکستان یونان ماہ رمضان میں اپنے مقید شہریوں سے ملاقات کر رہا ہے اور ان کی فلاح وبہبود کو یقینی بنانے کے لیے اقدامات اٹھا رہا ہے۔
