میرپورخاص (رپورٹ: ایم ہاشم شر) سینیئر سپریٹنڈنٹ آف پولیس ضلع میرپورخاص عابد علی بلوچ کی جانب سے ماہِ رمضان المبارک میں سکیورٹی انتظامات کے سلسلے میں ایس ایس پی آفس میرپورخاص میں اجلاس کا انعقاد۔ تفصیلات کے مطابق ایس ایس پی میرپورخاص عابد علی بلوچ کی جانب سے ماہِ رمضان المبارک کی آمد اور اس حوالے سے سکیورٹی انتظامات کے متعلق ایس ایس پی آفس میرپورخاص میں اجلاس منعقد کیا گیا۔ اجلاس میں انچارج ٹریفک، ایس ایچ او ٹاؤن، انجمن تاجران، چیمبر آف کامرس کے نمائندگان اور علماء حضرات نے شرکت کی۔ اس موقع پر ایس ایس پی میرپورخاص کا کہنا تھا کہ آج کے اجلاس کا مقصد رمضان المبارک کی آمد کے موقع پر سکیورٹی انتظامات کے حوالے سے مشاورت و مسائل کی نشاندہی اور اس حوالے سے بہتر سکیورٹی کی فراہمی ہے، ان کا مزید کہنا تھا کہ ماہِ رمضان میں مارکیٹ چوک اور اس سے ملحقہ علاقوں میں ٹریفک کی روانی کو برقرار رکھنا اور اس حوالے سے ناجائز تجاوزات کا خاتمہ ہماری اولین ترجیح ہےـ بعد ازاں انجمن تاجران، چیمبر آف کامرس کے نمائندگان اور مختلف مکاتب فکر سے تعلق رکھنے والے علماء کرام نے موجودہ سکیورٹی انتظامات پر اطمینان کا اظہار کرتے ہوئے ایس ایس پی میرپورخاص کا شکریہ ادا کیا اور نیک خواہشات کا اظہار کیا۔
