مالدیپ، (اسپورٹس ڈیسک) مالدیپ میں جاری ڈائمنڈ جوبلی انٹرنیشنل فٹبال ٹورنامنٹ میں پاکستان نے افغانستان کو 0-2 سے شکست دے کر فائنل کے لیے کوالیفائی کر لیا۔ عمر نواز نے میچ کے پانچویں منٹ میں شایق دوست کے شاندار پاس پر گول کر کے پاکستان کو برتری دلائی، جبکہ اضافی وقت میں ہارون حمید نے دوسرا گول کر کے قومی ٹیم کی کامیابی یقینی بنا دی۔ اس فتح کے ساتھ پاکستان نے چار ملکی ایونٹ کے راؤنڈ رابن مرحلے میں پہلی پوزیشن بھی حاصل کر لی۔
مالدیپ کے خلاف 0-3 کی کامیابی کے بعد پاکستان کو فائنل میں رسائی کے لیے صرف ایک ڈرا درکار تھا، تاہم قومی ٹیم نے جارحانہ کھیل پیش کرتے ہوئے افغانستان کو شکست دے دی۔ نولبرٹو سولانو کی زیر قیادت پاکستان 1962 کے مردیکا کپ کے بعد پہلی بار کسی آزاد بین الاقوامی فٹبال ٹورنامنٹ کے فائنل میں پہنچا ہے۔ پاکستان اب 10 جون کو ہونے والے فائنل میں افغانستان یا بنگلہ دیش میں سے کسی ایک ٹیم کا سامنا کرے گا۔
