ہائیر ایجوکیشن کمیشن کی جانب سے پاکستان یونیورسٹی اسپورٹس بورڈ کے ترمیم شدہ آئین اور قواعد نافذ العمل، ہائیر ایجوکیشن کمیشن (ایچ ای سی) کی جانب سے پاکستان میں یونیورسٹی اسپورٹس کے فروغ کے عزم کا اعادہ

کراچی، (رپورٹ، ذیشان حسین) ہائیر ایجوکیشن کمیشن پاکستان (ایچ ای سی) نے پاکستان یونیورسٹی اسپورٹس بورڈ (پی یو ایس بی) کے ترمیم شدہ آئین اور قواعد کا نفاذ کر دیا ہے پی یو ایس بی کے آئین اور قواعد و ضوابط کو سیکرٹری پی یو ایس بی کے نوٹیفیکیشن کے ذریعے ایچ ای سی کے کوآرڈینیشن ڈویژن کی جانب سے وائس چانسلرز کو بھجوایا گیا۔ ترمیم شدہ آئین 23 اگست2024ء سے نافذالعمل ہے۔ اس کا مقصدملک میں یونیورسٹی اسپورٹس کوفروغ دینے کے عزم کی عکاسی ہے یہ ترامیم ایچ ای سی کے چیئرمین پروفیسرڈاکٹر مختار احمد کی سربراہی میں کی گئیں جو قومی تعلیمی اور اسپورٹس پالیسیوں کی ہم آہنگی اور لیڈر شپ کو یقینی بناتی ہیں پی یو ایس بی کے چیئرمین کے طور پر پروفیسر ڈاکٹر مختار احمد ہی خدمات انجام دے رہے ہیں۔ اسپورٹس گورننگ باڈی اور تعلیمی اداروں کے درمیان روابط کو فروغ دینے کے لیے پی یو ایس بی کے دیگر عہدیداران میں ایگزیکیٹو ڈائریکٹر ایچ ای سی، ڈائریکٹر جنرل پاکستان اسپورٹس بورڈ اور پبلک و پرائیوٹ سیکٹرز کی جامعات کے وائس چانسلرز بطور ممبران شامل ہیں۔ نمایاں ترامیم کا تعلق مالی مراعات سے ہے اوریونیورسٹی کے ان طلباء کے لیے نقد انعامات اور انعامی رقم میں اضافہ کیا گیا ہے جو اسپورٹس کی سرگرمیوں میں غیرمعمولی صلاحیتوں کا مظاہرہ کرتے ہیں۔اس کے علاوہ نیا آئین طلباء کی فلاح و بہبود کے لیے ایک میڈیکل کمیشن قائم کرنے کا اشارہ بھی دیتا ہے اس قابلِ ذکر اقدام کے حوالے سے ایچ ای سی کے چیئرمین پروفیسر ڈاکٹر مختار احمد نے کہا کہ ایچ ای سی کی جانب سے کی جانے والی ان ترامیم کا مقصد پاکستان میں یونیورسٹی اسپورٹس کے لیے ایک پائیدار اور قابلِ عمل ماحول پیدا کرنا ہے۔اس طرح کے اقدامات نہ صرف پاکستانی کھلاڑیوں کی مسابقتی پوزیشن کو بلندکریں گے بلکہ آنے والی نسلوں کی مجموعی ترقی میں بھی معاون ثابت ہوں گے انہوں نے کہا کہ طلباء کی ذہنی اور جسمانی نشوونما میں غیر نصابی سرگرمیوں کی اہمیت کو تسلیم کرتے ہوئے اس کو ترجیح دینے کے لیے جامعات کی حوصلہ افزائی کی جاتی ہے پی یو ایس بی کا 25 قومی اور 2 بین الاقوامی اسپورٹس فیڈریشنز سے الحاق چل رہا ہے جو جامعات کے کھلاڑیوں کو مسابقتی مواقع کی رسائی فراہم کرتا ہے۔بورڈ لڑکوں اور لڑکیوں کے لیے مختلف کھیلوں کی 34 سالانہ انٹر ورسٹی چیمپئن شپس کا انعقاد کرتا ہے۔مزید برآں اتھلیٹس کی کارکردگی کو بہتر بنانے کے لیے کوچنگ، تربیتی کورسز اور کیمپس منعقد کیے جاتے ہیں۔پی یو ایس بی قومی اور بین الاقوامی کھیلوں کے مقابلوں میں یونیورسٹی کے کھلاڑیو ں کی شرکت کو یقینی بنانے کے لیے فعال کردار ادا کر رہا ہے ایچ ای سی کے Sports & Co-curricular Activities Division کے انچارج جو ذیلی کمیٹیوں کے نیٹ ورک کی بھی نگرانی کرتے ہیں، بوڑد کے اسٹریٹیجک اقدامات اور سرگرمیوں کو موثر انداز میں سر انجام دینے کے لیے خدمات سر انجام دے رہے ہیں۔