کراچی (رپورٹ: ذیشان حسین) سندھ حکومت کے ترجمان مشیر قانون، ماحولیات و ساحلی ترقی بیرسٹر مرتضی وہاب نے کراچی کے علاقے کورنگی میں چھ سالہ معصوم بچی ماہم کے ساتھ پیش آنے والے دل خراش واقعہ پر اپنے ویڈیو پیغام میں کہا ہے کہ پولیس نے ماہم کے ساتھ درندگی کرنے اور اس بچی کو قتل کرنے والے درندہ صفت انسان کو گرفتار کر لیا گیا ہے۔ انہوں نے کہا کہ سفاک قاتل کا ڈی این اے ماہم کے ڈی این اے سے میچ کر گیا ہے اور قاتل نے اپنے جرم کا اعتراف بھی کرلیا ہے۔ انہوں نے کہا کہ کورنگی پولیس نے تندہی سے کام کرتے ہوئے اس کیس کو منطقی انجام تک پہنچایا ہے اب یہ معاملہ عدالت میں چلے گا۔ انہوں نے درخواست کی ہے عدلیہ بھی اس سفاک قاتل کو کڑی سے کڑی سزا دے۔ بحیثیت معاشرہ کا فرد ہم سب نے اپنا کردار ادا کرنا ہے اور اپنے ارد گرد نظر رکھیں تاکہ آئندہ اس قسم کے اندوہناک واقعات پیش نہ آئیں۔ انہوں نے کہا کہ میں ماہم کے والدین کے ساتھ ہمدردی اور دلی تعزیت کا اظہار کرتا ہوں۔ ہم سب کے دل اس افسوسناک واقعہ پر رنجیدہ ہیں۔
