کراچی (رپورٹ: ذیشان حسین) پاکستان پیپلز پارٹی سندھ کے جنرل سیکرٹری وقار مہدی اور وزیر اطلاعات و محنت سندھ و صدر کراچی ڈویژن سعید غنی نے کہا ہے کہ موجودہ نااہل اور نالائق وفاقی حکومت کی ناقص پالیسیوں اور بدترین معاشی صورتحال نے ہر شعبہ ہائے زندگی سے تعلق رکھنے والوں کو مشکلات میں دھکیل دیا ہے۔ آج ملک کے زمینداروں اور کسانوں کو کھاد نہیں مل رہی ہے اور خدشہ ہے کہ آنے والے وقتوں میں خوراک کا بحران سر اٹھا لے گا۔ پیپلز پارٹی کے چیئرمین بلاول بھٹو کی ہدایات پر ملک بھر میں زمینداروں اور کسانوں کو کھاد کی عدم دستیابی کے خلاف کسان مارچ کا سلسلہ شروع ہوچکا ہے اور کراچی سمیت سندھ بھر کے 5 اضلاع میں پیر 24 جنوری کو احتجاجی ریلیاں نکالی جائیں گی۔ کراچی میں ملیر اور ویسٹ سے ریلیاں شارع فیصل سے ہوتی ہوئی مزار قائد کے عقب میں خدادا کالونی پہنچیں گی۔ موجودہ نالائق حکمرانوں نے نالائقیوں اور نااہلیوں نے پاکستان کو دنیا کا تیسرا مہنگائی سے دوچار ملک بنا دیا ہے۔ فی الحال لاک ڈاؤن لگانے اور تعلیمی اداروں کی بندش کے حوالے سے کوئی فیصلہ نہیں کیا گیا ہے، البتہ سپریم کورٹ کی ہدایات پر ہم این سی او سی کے فیصلوں کے پابند ہیں اور اگر این سی او سی یہ معاملہ صوبوں پر چھوڑتی ہے تو ہم اپنا فیصلہ کرنے کے مجاز ہیں۔ جس وقت ہم چاہیں پی ٹی آئی کے درجنوں ایم پی ایز اور ایم این ایز کو پیپلز پارٹی میں شامل کرسکتے ہیں اور وہ شمولیت کے لئے تیار ہیں۔
ان خیالات کا اظہار انہوں نے ہفتہ کے روز کیمپ آفس میں مشترکہ پریس کانفرنس کرتے ہوئے کیا۔ اس موقع پر پیپلز پارٹی کے رہنما زوالفقار قائمخانی، جاوید شیخ، ظفر صدیق، سردار نزاکت اور دیگر بھی ان کے ہمراہ موجود تھے۔ سعید غنی نے کہا کہ گذشتہ روز بھی چیئرمین بلاول بھٹو زرداری کی ہدایات پر ملک بھر میں کسان مارچ کا انعقاد کیا گیا، جس میں ہزاروں کی تعداد میں زمینداروں اور کسانوں نے حصہ لیا اور موجودہ نالائق اور نااہل وفاقی حکومت کے خلاف شدید احتجاج کیا۔ انہوں نے کہا کہ پیپلز پارٹی اس ملک کی واحد سیاسی جماعت ہے، جو عوامی مسائل پر عوام کے ساتھ کھڑی ہے اور ہم نے اس سے قبل بھی پیٹرولیم کی قیمتوں میں اضافہ، گیس کے بحران اور مہنگائی پر ملک گیر احتجاج کیا ہے اور اب کسانوں کو کھاد کی عدم دستیابی اور مارکیٹ میں 16 سو کی بجائے 35 سو کی کھاد کی بوری کی دستیابی کے خلاف ہم اپنے کسانوں کے ساتھ ہیں۔ انہوں نے کہا کہ سندھ کے 5 اضلاع کراچی، حیدرآباد، میرپور خاص، شہید بینظیر آباد اور سکھر میں 24 جنوری کو بھرپور احتجاجی کسان ریلیوں کا انعقاد کیا جائے گا۔ کراچی میں ڈسٹرکٹ ملیر اور ڈسٹرکٹ ویسٹ کے کسانوں اور ان سے اظہار یکجہتی ہے لئے تمام ڈسٹرکٹ سے ریلیاں نکالی جائیں گی جو دوپہر 2 بجے شروع ہوں گی اور وہ شارع فیصل سے ہوتی ہوئی مزار قائد کے عقب میں خداداد کالونی تک نکالی جائیں گی۔ ریلی کے اختتام پر پیپلز پارٹی کے قائدین خطاب کریں گے۔ سعید غنی نے مزید کہا کہ اس وقت پاکستان کے 22 کروڑ سے زائد عوام کا مسئلہ مہنگائی، گیس کا بحران، پیٹرول، ڈیزل، چینی، ادویات سمیت روزمرہ کی اشیاء کی قیمتوں میں بے تحاشہ اضافہ ہے لیکن وفاقی حکومت میں بیٹھے عمران نیازی کے 3 سو ترجمان اس بات کو ماننے کو تیار نہیں ہیں اور دلیل دیتے نہیں تھکتے کہ عالمی سطح پر مہنگائی ہے۔ انہوں نے کہا کہ حقیقت یہ ہے کہ ان نالائق اور نااہل حکمرانوں نے اس ملک کو عالمی سطح پر مہنگائی میں تیسرے نمبر پر لاکھڑا کر دیا ہے۔ انہوں نے کہا کہ وفاقی حکومت اور ان کے حامی سیاسی جماعتوں نے مہنگائی اور بیروزگاری سے عوام کی توجہ ہٹانے کے لئیے سندھ کے لوکل گورنمنٹ ایکٹ کی آڑ میں عوام کو گمراہ کرنا شروع کردیا ہے۔ انہوں نے کہا کہ آج بھی عوام کو لوکل گورنمنٹ بل نہیں بلکہ تین وقت کی روٹی، مہنگائی سے نجات، کھاد اور روزمرہ اشیاء کی بڑھتی قیمتوں کے کم ہونے کی ضرورت ہے۔ اس موقع پر وقار مہدی نے کہا کہ 21 جنوری کو ملک بھر اور سندھ کے متعدد اضلاع میں تاریخی کسان ریلیاں نکالی گئی، جس میں ہزاروں کی تعداد میں کسانوں نے شرکت کرکے موجودہ نااہل حکمرانوں کے خلاف اپنا بھرپور احتجاج ریکارڈ کروایا ہے اور اب 24 جنوری کو بھی سندھ کے 5 اضلاع سمیت ملک بھر میں کسان مارچ کا انعقاد ہوگا۔ انہوں نے کہا کہ اس وقت صورتحال اس حد تک ابتر ہوگئی ہے کہ 16 سو روپے میں ملنے والی کھاد کی بوری کسانوں کو 35 سو روپے میں بھی دستیاب نہیں ہے اور اگر صورتحال میں کوئی بہتری نہ ہوئی تو فصلیں نہ ہونے سے خوراک کا بحران سر اٹھا سکتا ہے۔ انہوں نے کہا کہ خسرو بختیار نے الزام عائد کیا ہے کہ سندھ نے کھاد افغانستان اسمگل کر دی ہے۔ یہ جاپان اورجرمنی کی سرحدیں ساتھ ہے کا بیان دینے جیسا بیان ہے، انہوں نے کہا کہ اگر ہم نے ایسا کیا تو وفاقی ادارے کہاں تھے، کسٹم والے بولٹن مارکیٹ میں تو چھاپے مارتے ہیں کیا کھاد اسمگل کرنے والوں کو نہیں روک سکتے۔
ایک سوال کے جواب میں سعید غنی نے کہا کہ ملک کا تین سال میں جو حشر کیا گیا ہے اس سے عوام بیزار ہے، عوام کی توجہ ہٹانے کے لئے بلدیاتی ترامیم پر احتجاج کیا جا رہا ہے۔ انہوں نے کہا کہ عام آدمی سے پوچھیں ان کو گیس چاہیئے یا بلدیاتی نظام یقیناً وہ کہیں گے گیس چاہیئے۔ صدارتی نظام کی افواہوں کے سوال کے جواب میں انہوں نے کہا کہ صدارتی نظام کی باتیں سیاسی شوشا ہے، ٹنڈو الہیار واقعہ کے سوال پر انہوں نے کہا کہ ذاتی دشمنی کا شاخسانہ ہے، جس نے قتل کیا وہ گرفتار ہے، مقتول کے ورثاء کی مرضی کے تحت ایف آئی آر داخل ہوئی ہے لیکن کل اس واقعے کو ایم کیو ایم نے لسانی رنگ دینے کی کوشش کی۔ انہوں نے کہا کہ اس واقعہ پر پولیس نے ایکشن لیا ہے اور ہنگامہ برپا کیا گیا جس کے خلاف بھی ایف آئی آر درج ہوئی ہے۔ کورونا کے باعث تعلیمی اداروں کی بندش اور لاک ڈاؤن کے سوال کے جواب میں انہوں نے کہا کہ اسکولز کی بندش یا کھلے رہنے کے فیصلے این سی او سی کی مشاورت سے کریں گے۔ انہوں نے کہا کہ اس وقت کورونا وائرس کی صورتحال تشویش ناک ضرور ہے لیکن اس وقت تک اسپتالوں میں ایمرجنسی جیسی کوئی صورتحال نہیں ہے اور اس حوالے سے سندھ حکومت کی ٹاسک فورس مکمل طور پر نظر رکھے ہوئے ہے اور خدانخواستہ کوئی زیادہ ابتر صورتحال ہوئی تو ہم اس حوالے سے کوئی فیصلہ کریں گے۔ جماعت اسلامی کے دھرنے اور احتجاج کے حوالے سے سوال کے جواب میں سعید غنی نے کہا کہ جماعت اسلامی احتجاج کر رہی ہے ہم نے کچھ نہیں کہا، لیکن یونیورسٹی روڈ جیسی سڑک بند کرنے کا کسی کو حق نہیں۔ عوام کے لئے احتجاج کرے کے دعویدارعوام کو پریشان کر رہے ہیں۔ انہوں نے کہا کہ ہم نے کسان مارچ میں بھی خیال کیا ہے کہ پانچ بجے تک احتجاج ختم کر دیں۔ ایک سوال کے جواب میں انہوں نے کہا کہ عوام عمرانی سرکس کے جوکروں علی زیدی ٹائیپ کے لوگوں سے تنگ ہیں، کنٹونمنٹ سے لیکر ضمنی انتخابات کے نتائج بتاتے ہیں کہ پی ٹی آئی کے نصیب میں ذلت ہے۔
