کراچی (رپورٹ: ذیشان حسین) ایس ایس بی سجاس اسپورٹس فیسٹول کے پہلے مرحلے میں کھیلے جانے والے کرکٹ ٹورنامنٹ کے فائنل میں اے آر وائی نیوز اپنے اعزاز کا دفاع کرنے میں کامیاب، تفصیلات کے مطابق ایس ایس بی سجاس اسپورٹس فیسٹول کے پہلے مرحلے میں کھیلے جانے والے کرکٹ ٹورنامنٹ کا فائنل دو روایتی حریفوں دفاعی چیمپیئن اے آر وائی نیوز اور جیو نیوز کے درمیان کھیلا گیا، اصغر علی شاہ اسٹیڈیم میں کھیلے جانے والے فائنل میں اے آر وائی نیوز نے پہلے بیٹنگ کرتے ہوئے مقررہ اوور میں 7 وکٹوں کے نقصان پر 193 رنز بنائے، فاتح ٹیم کے ان فارم کپتان بابر خان چالیس رنز اسکور کرنے کے ساتھ دو وکٹیں حاصل کرکے فائنل کے بہترین کھلاڑی قرار پائے، دیگر بلے بازوں میں عتیق احمد اور شہاب اختر 36، 36 رنز بناکر نمایاں رہے، ہدف کے تعاقب میں جیو نیوز کی اننگز مقررہ اوور میں تین وکٹوں کے نقصان پر 164 رنز تک محدود رہی، حماد کے 57 رنز بھی ان کی ٹیم کے کام نہ آسکے۔ فائنل کے مہمان خاص کوئٹہ گلیڈی ایٹر کے فرنچائزر اور عمر ایسوسی ایٹ کے چیف ایگزیکٹو ندیم عمر نے کھلاڑیوں میں انعامات تقسیم کئے، کپتان بابر خان وننگ اور جعفر حسین نے رنرز اپ ٹرافی وصل کی، ندیم عمر کا کہنا تھا کہ کھیل سے جڑے صحافیوں کو ایک پلیٹ فارم پہ متحد رکھنا اور میڈیا ہاؤسز کے درمیان سات کھیلوں پر مشتمل اسپورٹس فیسٹول کا انعقاد سجاس کا بڑا کام ہے، فائنل میں دو روایتی حریف کے آمنے سامنے ہونے سے ایک اچھا میچ دیکھنے کا اتفاق ہوا، سجاس بلو کے شہروز علوی ناقابل شکست سنچری اور ایک نصف سنچری کے ساتھ 6 وکٹیں لے کر ایونٹ کے بہترین آل راونڈر، تین نصف سنچریوں کے ساتھ اے آر وائی نیوز کے کپتان بابر خان بہترین بیٹر جبکہ سجاس بلو کے قلبے محمد بہترین وکٹ کیپر قرار پائے، تقریب تقسیم انعامات کے موقع پر سجاس کے سینئر نائب صدر زبیر نذیر خان، کوئٹہ گلیڈی ایٹر کے منیجر اعظم خان، سندھ اولمپک ایسوسی ایشن کے سینئر نائب صدر انجینئر محفوظ الحق، کے ڈی اے کے ایڈیشنل ڈائریکٹر اسپورٹس ایاز منشی، محمد نسیم، سجاس کے عہدیداران اور ممبران سمیت اسپورٹس لورز کی بڑی تعداد موجود تھے۔
