کراچی، (رپورٹ، ذیشان حسین/اسپورٹس رپورٹر) پاکستان کرکٹ بورڈ (پی سی بی) نے اعلان کیا ہے کہ زمبابوے ویمنز کرکٹ ٹیم اپنی تاریخ کے پہلے دورۂ پاکستان پر چھ میچوں پر مشتمل وائٹ بال سیریز کھیلنے کے لیے آئے گی۔ سیریز میں تین ون ڈے انٹرنیشنل اور تین ٹی ٹوئنٹی انٹرنیشنل میچز شامل ہوں گے، جن کے تمام مقابلے کراچی کے نیشنل بینک اسٹیڈیم میں کھیلے جائیں گے۔ زمبابوے ٹیم 29 اپریل کو کراچی پہنچے گی جبکہ دونوں ٹیمیں 30 اپریل سے 2 مئی تک ٹریننگ سیشنز میں حصہ لیں گی۔ ون ڈے سیریز، جو آئی سی سی ویمنز چیمپئن شپ 2025-29 کا حصہ ہے، 3، 6 اور 9 مئی کو کھیلی جائے گی اور تمام میچز سہ پہر 3:30 بجے شروع ہوں گے۔
ٹی ٹوئنٹی سیریز 12، 14 اور 15 مئی کو اسی مقام پر کھیلی جائے گی، جس کے تمام میچز رات 7:30 بجے شروع ہوں گے۔ یہ سیریز پاکستان ویمنز ٹیم کے لیے آئی سی سی ویمنز ٹی ٹوئنٹی ورلڈ کپ کی تیاری کے حوالے سے نہایت اہم ہے، جو 12 جون سے 5 جولائی تک انگلینڈ اور ویلز میں منعقد ہوگا۔ اس بڑے ایونٹ سے قبل قومی ٹیم آئرلینڈ میں سہ فریقی ٹی ٹوئنٹی ٹورنامنٹ میں بھی شرکت کرے گی، جس میں میزبان آئرلینڈ اور ویسٹ انڈیز کی ٹیمیں شامل ہوں گی، اور یہ ٹورنامنٹ 28 مئی سے 4 جون تک جاری رہے گا۔
