کراچی، (رپورٹ، ذیشان حسین/اسٹاف رپورٹر) وزیراعلیٰ سندھ سید مراد علی شاہ نے مینجمنٹ ایسوسی ایشن آف پاکستان (MAP) کی 25 ویں سالانہ کنونشن سے خطاب کرتے ہوئے کہا کہ میپ نے گزشتہ چھ دہائیوں سے پیشہ ورانہ مہارت اور قائدانہ صلاحیتوں کے فروغ میں شاندار خدمات انجام دی ہیں۔ انہوں نے تنظیم کی کامیابیوں کو سراہتے ہوئے کہا کہ یہ ادارہ ملک میں انتظامی معیار کی بہتری کا نمایاں کردار ادا کر رہا ہے۔
وزیراعلیٰ سندھ نے کہا کہ کراچی پاکستان کا معاشی حب اور سندھ کے ماتھے کا جھومر ہے، جہاں آج ملک کی بہترین ذہانت جمع ہے۔ انہوں نے کہا کہ ہم ایک ایسے اہم موڑ پر ہیں جہاں معاشی، ماحولیاتی اور انفراسٹرکچر کے چیلنجز کا سامنا ہے، اس لیے سیاسی مفادات سے بالاتر ہو کر اجتماعی ترقی کی سمت بڑھنا ہوگا۔
سید مراد علی شاہ نے کہا کہ پائیدار ترقی کے لیے انسانی سرمائے کا بہترین استعمال ناگزیر ہے۔ سندھ حکومت انفراسٹرکچر، ٹرانسپورٹ اور شہری سہولیات کی بہتری پر توجہ دے رہی ہے۔ انہوں نے بتایا کہ کے-فور واٹر سپلائی اسکیم کی بروقت تکمیل سے کراچی کے پانی کا مسئلہ حل کیا جائے گا۔
وزیراعلیٰ سندھ نے کہا کہ سرکاری و نجی شعبوں کا اشتراک صوبے کی پائیدار ترقی کے لیے ضروری ہے۔ انہوں نے سندھ ٹیکنیکل ایجوکیشن اینڈ ووکیشنل ٹریننگ اتھارٹی (STEVTA) کے ذریعے پیشہ ورانہ تربیت کے معیار کو بلند کرنے کے عزم کا اظہار کیا اور میپ کے تربیتی پروگرامز کو خوش آئند قرار دیا۔
آخر میں وزیراعلیٰ سندھ نے کہا کہ سندھ حکومت بہتر کاروباری ماحول، گڈ گورننس اور پیشہ ورانہ اہلیت کے فروغ کے لیے پرعزم ہے۔ انہوں نے کہا کہ “ہم ایک ایسے سندھ کی تعمیر چاہتے ہیں جو معاشی قوت، شفاف حکمرانی اور پیشہ ورانہ مہارت کا نمونہ ہو۔”
