کراچی، (رپورٹ، ذیشان حسین) لفظوں کے جادوگر، مزاح اور شگفتہ بیان کے ماہر عبدالخالق بٹ کے اعزاز میں کراچی پریس کلب کے صحافتی ماحول میں ایک یادگار شام سجائی گئی۔ کے یو جے (دستور) کی جانب سے منعقدہ اس استقبالیے میں اسلام آباد سے آئے اس سینئر صحافی و مصنف نے مرحوم اطہر ہاشمی کی یادیں تازہ کرتے ہوئے زبان، ادب اور صحافت پر اپنے مخصوص انداز میں گفتگو کی۔
تقریب میں سوال و جواب کا ایک دل چسپ سلسلہ بھی ہوا، جہاں حاضرین نے اپنے سوالات رکھے اور عبدالخالق بٹ نے برجستہ جوابات سے محفل لوٹ لی۔ اردو زبان کے فروغ اور خدمات کے اعتراف میں کے یو جے (دستور) کے صدر نصراللہ چودھری اور سیکرٹری ریحان چشتی نے انہیں اعزازی شیلڈ پیش کی۔
شام میں کراچی پریس کلب کے سیکرٹری سہیل افضل خان، مقصود یوسفی، احمد حسن، اظہر حسین، طارق ابوالحسن، نعمت خان، رضوان بھٹی، عمران ایوب، محمد منصف، ریاض ساگر، معین اللہ، اے کے محسن، ندیم صدیقی، امین میمن، ڈاکٹر ظفر اقبال، کلیم الدین، ثاقب صغیر سمیت صحافت و ادب کی متعدد شخصیات موجود تھیں، جن کی موجودگی نے تقریب کو مزید باوقار بنا دیا۔
