کراچی (رپورٹ: ذیشان حسین) سندھ حکومت کے ترجمان، مشیر قانون، ماحولیات و ساحلی ترقی بیرسٹر مرتضی وہاب کو حکومت سندھ نے کراچی کا نیا ایڈمنسٹریٹر لگانے کا فیصلہ کرلیا ہے۔ سندھ حکومت کے ذرائع کے مطابق حکومت سندھ نے کراچی کے نئے ایڈمنسٹریٹر کے لئے بیرسٹر مرتضی وہاب کا انتخاب کرلیا اس حوالے سے جلد ہی حکومت سندھ باضابطہ طور پر نوٹیفکیشن جاری کرے گی۔ واضح رہے کہ کل ہی بیرسٹر مرتضی وہاب نے کراچی کے مختلف علاقوں کا دورہ بھی کیا تھا۔ سندھ حکومت کے ذرائع کے مطابق آئندہ ہفتے مرتضیٰ وہاب نئے ایڈمنسٹریٹر کراچی کا چارج لیں گے۔
