میرپورخاص (رپورٹ: ایم ہاشم شر) مسلسل بڑھتی ہوئی مہنگائی نے عوام کی زندگی کو اجیرن اور مشکل ترین کردیا ہے سونامی کا طوفان قومی خزانہ لوٹنے والوں کے بجائے غریب عوام کی تباہی و بربادی کا سبب بنا ہوا ہے۔ جماعت اسلامی ملک گیر احتجاج کے موقع پر جمعہ کو میرپورخاص شہر میں مہنگائی کے خلاف بڑا احتجاج منعقد کریگی۔ ان خیالات کا اظہار جنرل سیکریٹری جماعت اسلامی میرپورخاص عاصم شیخ نے ملک میں مہنگائی کے طوفان کے باعث عوام کی زندگی اجیرن ہوتی ہوئی زندگی پر تبصرہ کرتے ہوئے کیا، انہوں نے مزید کہا کہ امیر جماعت اسلامی پاکستان کی اپیل پر مہنگائی اور بیروزگاری کے خلاف ملک بھر کی طرح میرپورخاص میں بھی بروز جمعہ مورخہ 6 مارچ بعد نمازِ جمعہ مدینہ مسجد چوک پر احتجاج ہوگا جس سے جماعت اسلامی کے ضلعی اور مقامی رہنما خطاب کریں گے۔ انہوں نے عوام الناس سے مہنگائی اور بیروزگاری کے خلاف جماعتِ اسلامی کی اس تحریک میں حصہ بننے اور احتجاجی پروگرام میں شریک ہونے کی دعوت دی ہے۔
